Gjergj Bojaxhi zyrtarizon i pari kandidaturën si i pavarur, duke vënë në test skenën e polarizuar politike me mbështetjen që synon të marrë nga të pakënaqurit.
Gjergj Bojaxhi hyn në garën për bashkinë e Tiranës, duke sfiduar si kandidat i pavarur skenën e polarizuar politike në Shqipëri. Bojaxhi zyrtarizoi kandidaturën e tij të hënën, me vetëdijen se sapo kishte ndërmarrë një sfidë të vështirë.
Në deklaratën e tij për mediat, Bojaxhi tha se të zhgënjyerit nga partitë dhe biznesi janë shumë më tepër se përfituesit e tyre.
“Ne në Tiranë jemi pa siguri dhe qetësi, pa rrugë të lira dhe ajër të pastër. Ne jemi shumica dhe bëjmë thirrje të bashkohemi, për të kthyer qytetin në duart e qytetarëve,” deklaroi ai.
Gjergj Bojaxhi vjen në këtë garë me përvojën e tij si ish-drejtor i Koorporatës Energjetike Shqiptare dhe ish-anëtar i KOP-it në Partinë Demokratike, me të cilën ka shkëputur lidhjet vitet e fundit.
Kandidatura e tij u zyrtarizua dy ditë para shpalljes zyrtare të kandidatëve për zgjedhjet lokale të 21 qershorit. Partia Socialiste dhe Partia Demokratike nuk kanë vendosur ende se cilët janë emrat që do t’i përfaqësojnë në këtë garë.
Zgjedhjet vendore të 21 qershorit do të testojnë ndarjen e re administrative të vendit. Ndërsa beteja për Tiranën konsiderohet njëherazi si përballje politike mes qeverisë së majtë të Edi Ramës dhe Partisë Demokratike në opozitë, që drejtohet nga kryetari aktual i Bashkisë, Lulzim Basha.
Brenda kampit të majtë, aleatët PS dhe LSI kanë ndarë tashmë tortën elektorale të bashkive. Në 48 orët e fundit pritet që të shpallen kandidaturat e të dyja kaheve të politikës, duke ndezur tre muaj para zgjedhjeve, motorët e fushatës elektorale.
Sfide nuk eshte. Sfide nuk ben dot. Ben sikur. E di mire qe nuk fiton. (te behet kryetar Bashkie) . Se cfare fiton; ai vete e di.
Gjergji duhet te ndertoje nje strategji per te ruajtur votat qe do jene te shumta.
Ndoshat me nje monitorim nderkombetar.