Ministrja e Arsimit, Lindita Nikolla tha se ligji i ri do të rrisë cilësinë e studentëve dhe autonominë e universiteteve, por reforma kundërshtohet nga një grup pedagogësh dhe studentësh.
Qeveria shqiptare miratoi të hënën projektligjin e debatueshëm për Arsimin e Lartë, i cili synon të ndryshojë skemën e financimit të universiteteve. Pas mbledhjes së qeverisë, ministja e Arsimit dhe Sportit, Lindita Nikolla tha në një deklaratë për mediat se në thelb të reformës është cilësia e arsimit në Shqipëri.
“Ne nuk bëjmë kompromis me cilësinë. Ndaj ky ligj rrit besimin e prindërve dhe të studentëve se financat e tyre do të vlerësohen,” tha ministrja Nikolla.
Ministrja premtoi gjithashtu se përmes ligjit të ri do të rritet cilësia e pedagogëve, standardet e mësimdhënies dhe konkurrenca mes universiteteve shqiptare.
“Koha e universiteteve që bëjnë sikur japin mësim ka marrë fund. Ministria, Universitetet, profesorati si dhe agjencitë e tjera të arsimit janë mjete në funksion të arsimit cilësor,” shtoi ministrja Nikolla.
Ligji i qeverisë së majtë për Arsimin e Lartë u miratua në qeveri, pas një rrugëtimi të gjatë përgatitjesh dhe konsultimesh. Megjithatë, komisioni i ngritur për të realizuar reformën nuk arriti të sigurojë konsensusin e të gjithë aktorëve të sistemit.
Pika më e debatueshme është skema e financimit, pasi projektligji synon të kthejë në universitete publike, entet shtetërore dhe ato private të Arsimit të Lartë. Ai parashikon gjithashtu që paratë nga buxheti i shtetit t’u akordohen studentëve dhe ata mund të zgjedhin më pas se cilin universitet do të ndjekin.
Një grup studentësh të fakulteteve të ndryshme të Tiranës, të cilët kanë organizuar disa protesta e kundërshtojnë fort këtë pikë të reformës, duke kërkuar nga qeveria të sigurojë arsimin falas për të gjithë.
Duke i paraprirë kësaj kritike, ministrja e Arsimit dhe Sportit, Lindita Nikolla tha se ligji i ri nuk i devijon paratë publike drejt universiteteve private. “Ky ligj nxit privation të financojë në sektorin publik,” argumentoi ai.
Autonomia e universiteteve, e cila ndryshon me ligjin e ri ka qenë një tjetër pikë e debatueshme nga profesorët e universiteteve. Reforma parashikon ndarjen e administrimit financiar nga ai akademik, ndërkohë që kundërshtarët e reformës argumentojnë se qeveria do të rrisë kësisoj kontrollin mbi universitetet, përmes kontrollit financiar.
Sipas ministres Nikolla, ligji i ri optimizon financimin publik të shtresave në nevojë, ekselencën dhe mbron të mirën publike, përmes financimit të degëve me rëndësi strategjike për vendin.
“Universitetet do të kenë autonomin më të lartë, duke ndërtuar vetë stafin akademik, duke i dhënë vetë atyre mundësinë të zgjedhin numrin e studentëve apo cilësinë e tyre”, tha Nikolla.
Por studentët, të cilët janë mbledhur rreth një grupi të quajtur “Për universitetin” kanë paralajmëruar se do të vazhdojnë protestat, derisa zëri i tyre të dëgjohet.