Gjykata e Krimeve të Rënda urdhëroi lirimin nga burgu të Arben Frrokut, me argumentin se provat e Prokurorisë nuk bindin për ta dënuar atë si autor të vrasjes së komisarit Dritan Lamaj.
Gjykata e Krimeve të Rënda shpall të pafajshëm Arben Frrokun, afro dy vjet pas vrasjes së komisarit të policisë, Dritan Lamaj. Vendimi i pafajësisë u shpall nga gjyqtari Dritan Hallunaj, i cili argumentoi se provat e Prokurorisë nuk bindin se Frroku është autor i vrasjes së zyrtarit të policisë, ngjarje kjo e ndodhur më 24 shkurt të vitit 2013.
“Arben Frroku shpallet i pafajshëm, pasi provat e Prokurorisë nuk janë bindëse. Urdhërojmë lirimin e menjëhershëm të tij nga burgu,” ishte vendimi i Gjykatës së Krimeve të Rënda.
Një seancë më parë, Prokuroria e Krimeve të Rënda kërkoi burgim të përjetshëm për Arben Frrokun. Përgjatë 13 muajve të gjykimit, Prokuroria paraqiti si prova në gjykatë deklarimet e një dëshmitari okular, përgjimet telefonike dhe rezultatet e një eksperimenti, që sipas hetuesve rrëzonte alibinë e Arben Frrokut.
“Jam i lumtur që u provua në gjyq se Arben Frroku nuk është autor i kësaj vrasjeje,” tha avokati i të akuzuarit, menjëherë pas përfundimit të gjyqit. “Klienti im ndodhej në dalje të Elbasanit, në kohën e kryerjes së vrasjes në Tiranë,” shtoi ai.
Që prej 24 shkurtit 2013, kur komisari Dritan Lamaj u ekzekutua afër banesës së tij në Tiranë, policia dhe Prokuroria i fokusuan dyshimet e tyre tek biznesmeni Arben Frroku. Motivi i këtij dyshimi ishte një konflikt i ashpër mes ish-shefit të ndjerë të komisariatit nr.6 në Tiranë dhe biznesmenit Frroku.
Gjatë procesit gjyqësor që zgjati 13 muaj, Prokuroria i ofroi Gjykatës së Krimeve të Rënda dëshminë e një personi, i cili pretendoi se e kishte parë Frrokun pa maskë në kokë, brenda makinës prej nga u qëllua komisari.
Arben Frroku pretendoi se në kohën e vrasjes ndodhej në Elbasan, duke ikur drejt Greqisë dhe se akuzat e ngritura kundër tij kishin “prapavijë politike”.
Kundër alibisë së Frrokut, Prokuroria e Krimeve të Rënda realizoi një eksperiment hetimor për të matur kohën e udhëtimit nga Tirana në Kapshticë. Gjykata e Krimeve të Rënda e pranoi si provë këtë eksperiment.
“Prokuroria pati fantazi, por provat e saj nuk qëndrojnë. Ndërsa ne ofruam prova të forta që vërtetojnë se Frroku nuk është autor i krimit,” shtoi avokati i Arben Frrokut.
Arben Frroku fitoi lirinë thuajse në të njëjtën kohë me arrestimin e dytë të vëllait të tij deputet, Mark Frroku. Ky i fundit akuzohet nga Prokuroria belge për një vrasje të kryer në Bruksel në vitin 1999.
