Foto nga LSA / GENT SHKULLAKU
Pas kallëzimit të ILDKP, Prokuroria regjistron procedimin penal për deputetin demokrat, Ridvan Bode dhe nis hetimin mbi ligjshmërinë e burimit të pasurisë së tij.
Foto nga LSA / GENT SHKULLAKU
Deputeti demokrat Ridvan Bode, ish-ministër i Financave në qeverinë “Berisha”, do të hetohet nga Prokuroria për ligjshmërinë e pasurisë së tij. Dy javë pas kallëzimit të Inspektoriatit të Lartë të Deklarimit të Pasurive, Prokuroria vendosi të regjistrojë procedimin penal ndaj Ridvan Bodes, i cili dyshohet për veprën penale të “ fshehje, mosdeklarim dhe deklarim të rremë të pasurisë”.
Një zyrtar i Prokurorisë së Përgjithshme i tha BIRN se ka nisur hetimi mbi ligjshmërinë e burimit të pasurisë së deputetit demokrat, Ridvan Bode. “Prokuroria vlerëson se është e nevojshme kryerja e veprimeve hetimore, për të vërtetuar nëse ekzistojnë elementë të veprës penale, për të cilën është kallëzuar,” tha ai.
Inspektoriati i Lartë i Deklarimit dhe Kontrollit të Pasurive, ILDKP e kallëzoi në Prokurori ish-ministrin e Financave më 7 prill 2015. Sipas ILDKP, Bode u njoftua disa herë, por refuzoi të paraqitet për të dhënë shpjegime mbi burimin e pasurive të tij apo të familjarëve të lidhur me të për vitin 2013.
“Ai refuzoi të paraqiste dokumentacionin justifikues-ligjor për to,” thuhet në kallëzimin e ILDKP.
Në deklaratën e tij të pasurisë për vitin 2013, ish-ministri Bode pohon se ka një depozitë prej 720 mijë lekësh në një llogari bankare. Ai deklaron gjithashtu se ka shlyer kredinë për banesë, të marrë nga Enti Kombëtar i Banesave.
Pasuria e ish-ministrit është shtuar ndjeshëm nga rivlerësimi i një apartamenti, i deklaruar më parë në vlerën e 3.6 milionë lekëve. Pas rivlerësimit, kjo pasuri është deklaruar në vlerën e 27 357 000 lekëve. Gjatë vitit 2013, Bode ka deklaruar gjithashtu se ka përfituar 18 mijë euro nga qiraja e banesave që disponon.
Në të njëjtin vit, bashkëshortja e Bodes rezulton me dy apartamente në pronësi, ndërsa e bija ka blerë një autoveturë për 990 mijë lekë.
Inspektoriati i Lartë i Deklarimit të Pasurive pretendon se ish-ministri Bode nuk ka justifikuar burimin e disa prej këtyre pasurive për vitin 2013. Deputeti Ridvan Bode e cilësoi akuzën e ILDKP si të motivuar politikisht, ndërsa tha se pasuria e tij është deklaruar konform ligjit.
“Kallëzimi i ILDKP synon denigrimin tim dhe ka prapaskenë politike,” tha ish-ministri Bode në një konferencë për mediat. Ai paralajmëroi gjithashtu se do t’i përgjigjej me kallëzim penal këtij “sulmi” të ILDKP.
Ish-ministri i Financave gjatë qeverisjes së PD-së, Ridvan Bode nuk është politikani i vetëm që po hetohet për pasurinë e tij. Prokuroria ka nisur një hetim të ngjashëm edhe për deputetin e arrestuar të mazhorancës, Mark Frroku, i cili u kallëzua gjithashtu nga ILDKP.
Prokuroria po vazhdon hetimet kundër një gjyqtari dhe një prokurori që akuzohen për fshehje pasurie, ndërsa javën e kaluar dërgoi në gjyq dosjen penale për gjyqtarin e Kavajës, Osman Aliu.
Megjithatë, në 10 vitet e funksionimit të Inspektoriatit të Lartë të Deklarimit të Pasurive, asnjë zyrtar i lartë nuk është dënuar për veprat penale që lidhen me pasurinë e tij.
