Gazetarët maqedonas dhe aktivistët e të drejtave vunë në mënyrë simbolike një kurorë lulesh funerali në godinën qeveritare për të protestuar kundër kërcënimit të kolegut të tyre.
Gazetarët, aktivistët e OJQ-ve dhe disa ish-politikanë iu bashkuan shprehjes së mbështetjes për gazetarin Borjan Jovanovski pasi një kurorë funerali iu dërgua prej një personi anonim në shtëpinë e tij.
Në një protestë simbolike, gazetarët çuan kurorat e tyre me lule te qeveria, ku shkruheshin të njëjtat fjalë “Lamtumirë”. Disa hodhën lule funerali mbi ndërtesën qeveritare.
“Ne nuk mendojmë se qeveria e ka çuar kurorën, por qeveria dhe institucionet kanë lejuar një atmosferë në të cilën disa njerëz guxojnë të dërgojnë kërcënime vdekje te ata që mendojnë ndryshe dhe shkruajnë kritika,” tha gazetari Saska Cvetkovska në protestë.
Kolegia e Jovanovskit dhe bashkëredaktore te Nova TV, ku ai punon, Biljana Sekulovska, i bëri thirrje autoriteteve të ofrojnë ndihmë policore për Jovanovskin.
“Ne kërkojmë mbrojtje policore për Jovanovskin dhe nëse ata nuk ia ofojnë, do t’i quajmë autoritetet si bashkëpunëtore në këtë krim,” tha Sekulovska.
Ajo iu referua gjithashtu vdekjes së gazetarit të njohur Nikola Mladenov, që vdiq në një aksident me makinë pranë Shkupit në mars 2013. Vdekja u deklarua një aksident, por disa vazhdojnë të akuzojnë qeverinë për përfshirje.
Përfaqësuesja e OSBE për Lirinë e Medias, Dunja Mijatovic, gjithashtu i bëri thirrje autoriteteve të investigojnë kërcënimin e bërë kundër qeverisë së Jovanovskit dhe familjes së tij.
“Ky akt i tmerrshëm është konform situatës së brishtë të medias dhe dërgon mesazhe që zërat kritikues të heshtin,” tha Mijatovic.
“Akte të tilla kanë një efekt të qartë frikësues mbi një media të lirë dhe nuk janë të pranueshme në një shoqëri demokratike,” shtoi ajo.
Unioni më i madh dhe më i vjetër i vendit, Lidhja e Gazetarëve të Maqedonisë, ZNM, dhe Instituti Maqedonas për Median MIM, gjithashtu dënuan kërcënimin duke akuzuar institucionet shtetërore për nxitjen e një atmosfere intolerance.
Partia qeverisëse maqedonase dënoi kërcënimin e bërë ndaj gazetarit dhe mohoi çdo përfshirje me çështjen e kurorës.
“Ngjarje të tilla janë plotësisht të papranueshme për VMRO DPMNE dhe janë të dëmshme, si personalisht për gazetarin Borjan Jovanovski dhe familjen e tij, dhe për atmosferën në përgjithësi në vend”, tha partia.
Shqetësimet për lirinë e medias në Maqedoni janë ngritur prej kohësh. Indeksi i fundit i Lirisë së Medias në Botë, publikuar nga Gazetarët pa Kufi, e klasifikuan Maqedoninë ndër vendet e fundit në Ballkan.
