Dhjetra banorë të fshatit Marinzë bllokuan mjetet e kompanisë Bankers, në shenjë proteste kundër dëmshpërblimeve selektive dhe masave të pamjaftueshme për të garantuar jetën e tyre.
Dhjetra banorë të fshatit Marinzë të Fierit kanë protestuar kundër kompanisë kanadeze, Bankers Petroleum, e cila shfrytëzon prej 10 vitesh zonën naftëmbajtëse që ndodhet pranë shtëpive të tyre. Rreth 150 banorë kanë bllokuar rrugën kryesore të fshatit, duke kërkuar nga kompania që të marrë përsipër dëmet e shkaktuara nga aktiviteti i saj industrial.
Banorët e Marinzës pretendojnë se shpërthimet e gazit dhe ujërave nëntokësore të datës 1 prill 2015 u kanë dëmtuar produktet bujqësore dhe blegtorinë. Por ndryshe nga shtëpitë pranë puseve të naftës, ata nuk janë përfshirë në planin e dëmshpërblimit të kompanisë.
“Kërkojmë të trajtohemi me ndihmë financiare, njëlloj si banorët që i kanë shtëpitë pranë puseve të naftës,” tha njëri nga protestuesit e Marinzës.
“Ne kemi pësuar dëme njëlloj si ata, por nuk jemi përfshirë në dëmshpërblim,” shtoi ai.
Mbrëmjen e së premtes, rreth 750 banorë të fshatit Marinzë i dorëzuan kompanisë kanadeze, Bankers Petroleum një peticion me tetë pika, përmes së cilës parashtronin kërkesat e tyre. Ata kërkojnë dëmshpërblim 100 për qind për dëmet e shkaktuara nga shpërthimet e 1 prillit, por edhe një sërë masash që garantojnë pronat dhe shëndetin e tyre.
Në peticionin e lexuar nga BIRN, banorët e Marinzës kërkojnë shërbim shëndetësor falas dhe ndërprerje të shpërthimeve nëntokësore. Ata i kërkojnë gjithashtu kompanisë që të marrë përsipër dhe të rehabilitojë tokat e kontaminuara.
Të kontaktuar nga BIRN, Bankers Petroleum nuk komentoi kërkesat e banorëve. Por në faqen e vet të internetit, kompania thotë se po punon në bashkëpunim me Komisionin e Komunës dhe Ministrinë e Energjetikës për të garantuar një kompensim të drejtë dhe në kohë.
“Bankers ka sjellë në zonë ekspertë nga Fieri, Tirana dhe Britania e Madhe për të asistuar në vlerësimin gjeoteknik të dëmtimeve sipërfaqësore të tokës dhe dëmtimin e strukturave të shtëpive si pasojë e çlirimit të gazit,” thuhet në njoftim.
Banorët e Marinzës pretendojnë megjithatë se vlerësimet e dëmit kanë qenë selektive dhe të pasakta.
“Protesta jonë nuk do të ndalet, derisa kërkesat tona të merren parasysh,” thanë banorët-protestues. “Në të kundërt, ne do të kërkojmë shpërnguljen e të gjithë fshatit, sepse jeta jonë është bërë e pamundur,” shtuan ata.
