Aktivistët e lëvizjes Për Universitetin kanë mbajtur një protestë simbolike përpara ministrisë së arsimit të hënën, në përgjigje të letrës së hapur të ministres Lindita Nikolla për reformën e arsimit të lartë.
Në mënyrë simbolike aktivistët kanë kyçur me dry për pak minuta derën e ministrisë, duke e akuzuar Nikollën së përfaqëson interesat e kompanive private që operojnë në tregun e arsimit të lartë dhe jo ato të studentëve.
Nëpërmjet një njoftimi të shpërndarë në rrjetet sociale aktivistët shpjeguan që ky qëndrim vinte si përgjigje ndaj letrës publike drejtuar studentëve nga Nikolla, të cilën ata shprehen se ripërsërit të pavërteta për reformën e arsimit të lartë.
“Në letër, Ministrja thotë se kjo reformë, për sa i përket rritjes së tarifave hyn në fuqi jo për studentët aktualë por për ata që do të regjistrohen në universitet, dhe kjo është një gënjeshtër e madhe, pasi rritja e tarifave është realitet i çdovitshëm tashmë, ku edhe gjatë këtij viti u rritën me rreth 20%,” shkruajnë aktivistët në përgjigjen e tyre për ministren e arsimit.
“Por edhe sikur kjo të mos ndodhte, ftesa për të heshtur përballë zhvatjes ekonomike ndaj brezit tjetër studentor, që u përket familjarëve, të afërmve dhe bashkëqytetarëve tanë, është skandaloze dhe korruptive,” shtojnë ato.
Sipas aktivistëve pretendimi i ministres Nikolla se reforma do t’u japë të drejta studentëve brenda universitetit është një tjetër gënjeshtër ulëritëse.
“Të drejtat që jep Ministrja, janë e drejta për të marrë borxhe dhe e drejta për të gënjyer në lidhje me cilësinë e universitetit, si mundësi për të marrë sa më pak borxhe, sepse kështu, duke gënjyer shteti do të japë disa qindarka më shumë për universitetin, duke gënjyer se do të marre disa të tilla me pak nga xhepat studentore,” shprehen ato.
“Ministrja Nikolla thotë se do t’i japë pavarësi universitetit, pavarësi për t’u marrë vetë me mbijetesën dhe për të rritur tarifat sa e si të duan që të sigurojë mbijetesën në fjalë, pra liri për ta braktisur në mes të katër rrugëve dhe për të thelluar më tej zhvatjen studentore,” ato shtuan.
