Deputeti socialist, Taulant Balla propozon heqjen e nenit 62 që kufizon pronësinë e mediave audiovizive, në prag të ndarjes së licensave dixhitale. Projektligji, në pritje të mendimit të OSBE, KE dhe KiE
Në prag të ndarjes së licensave kombëtare për transmetimet dixhitale, në Kuvend ka mbërritur një projektligj që synon të heqë barrierat e pronësisë mbi mediat audiovizive shqiptare. Projektligji mban firmën e deputetit të mazhorancës, Taulant Balla dhe kërkon shfuqizimin e nenit 62 të ligjit “Për mediat audiovizive në Republikën e Shqipërisë”.
Neni 62 i ligjit nr.97/2013 përcakton se “asnjë person fizik apo juridik, vendas apo i huaj nuk mund të ketë më shumë se 40 për qind të kapitalit të shoqërisë aksionare, që zotëron një licensë kombëtare të transmetimit audioviziv”.
Në rastin e marrjes së një license të dytë kombëtare, i njëjti nen i ligjit ngushton kufirin e aksioneve të lejueshme në 20 për qind.
Kufizimet ligjore mbi pronësinë u vendosën për të shmangur monopolet në tregun e transmetimeve televizive. Megjithatë, neni 62 i ligjit ka futur njëherazi në ngërç procesin e ndarjes së licensave për transmetimet dixhitale nga Autoriteti i Mediave Audiovizive (AMA).
Bashkimi Ndërkombëtar i Telekomunikacioneve (ITU) ka përcaktuar 17 qershorin 2015 si datën finale të mbylljes së transmetimeve televizive analoge dhe kalimin në transmetimet dixhitale. Por megjithëse kjo datë po afron, Shqipëria mbetet pas në këtë proces.
Pas një vonese të gjatë dhe një procesi gjyqësor, Televizioni Publik Shqiptar firmosi më 19 mars 2015 kontratën me kompaninë gjermane Rohde & Schëartz, e cila do të ndërtojë dy rrjete dixhitale. Autoriteti i Mediave Audiovizive (AMA) i ka dhënë 2 licensa Televizionit Publik, nga shtatë të tilla që Shqipëria disponon.
Pesë licensat e tjera pritet të ndahen mes Top Channel, TV Klan, Vizion Plus dhe platformave të tyre dixhitale.
Kufizimet e pronësisë, të përcaktuara në nenin 62 të ligjit nr. 97/2013 shkaktojnë pengesa për disa prej operatorëve pretendentë, që synojnë të pajisen me licensa të dyta kombëtare për transmetimet dixhitale.
Në projektligjin e dorëzuar në Kuvend, deputeti Taulant Balla shpjegon se kufizimet e pronësisë janë kthyer në pengesë reale për zhvillimin e mediave në Shqipëri.
“Ndryshimet e propozuara eliminojnë ligjërisht vendosjen e barrierave të panevojshme, të cilat kufizojnë në mënyrë të panevojshme dhe të paargumentuar pronësinë e kapitalit,” thotë Balla në relacion.
“Në këtë mënyrë cenohet konkurrenca e ndershme dhe efektive, mund të ulet cilësia e shërbimeve audiovizuale si dhe cenohet një nga parimet themelore mbi të cilat AMA duhet të kryejë veprimtarinë e saj,” shpjegon më tej ai.
Ai pranon gjithashtu se përdorimi efektiv i frekuencave dixhitale nuk mund të realizohet përmes kufizimit të pronësisë, “por përmes zhvillimit të tregut të brendshëm, konkurrencës dhe futjes së teknologjive të reja numerike”.
Më 6 maj 2015, projektligji “Balla” u shtrua për diskutim në Komisionin e Medias në Parlament, por nuk arriti të mblidhte konsensusin e nevojshëm të deputetëve-anëtarë të këtij komisioni.
BIRN ka siguruar vendimin e Komisionit të Medias mbi këtë çështje, ku deputetët kanë rënë dakord të kërkojnë asistencë teknike nga OSBE, Komisioni Europian dhe Këshilli i Europës, para se të vendosin pro ose kundër ndryshimit ligjor të propozuar nga Balla.
Ligji “Për Mediat Audiovizive në Republikën e Shqipërisë” u miratua në mars të vitit 2013 me asistencë teknike të organizmave ndërkombëtare. Për këtë arsye, Komisioni i Medias ka preferuar të marrë mendimin e OSBE, Komisionit Europian dhe Këshillit të Europës para se të shprehet për projektligjin e propozuar nga deputeti i mazhorancës.
