Policia maqedonase deklaron për herë të dytë brenda 24 orësh se luftimet kanë përfunduar në lagjen e Trimave në Kumanovë, ku tetë policë dhe 14 pjesëtarë të grupit të armatosur kanë mbetur të vrarë. Policia nuk jep të dhëna për viktima të mundshme mes civilëve.
Armët heshtën pasditen e së dielës në Kumanovë ku përgjatë dy ditëve të fundit pati përleshje të ashpra që lanë tetë policë dhe 14 anëtarë të një grupimi të cilit Maqedonia iu referua si “terroristë” të vdekur si dhe së paku 37 oficerë policie të plagosur.
Zëdhënësi i policisë Ivo Kotevski tha në një konferencë për shtyp se operacioni është mbyllur dhe se policia po punonte për identifikimin e 14 të vrarëve. Ai shtoi se rreth 30 njerëz nga grupimi janë dorëzuar. Ai tha se nuk kishte informacion për viktima mes civilëve.
Policia e Maqedonisë publikoi gjithashtu një video të të kapurve, disa prej të cilëve duket se janë me veshje ushtarake me shenja të UÇK.
Pas një nate relativisht të qetë, të shtënat rifilluan rreth orës 7 të mëngjesit të së dielës ndërsa policia hyri në zonë në kërkim të më shumë njerëzve të akuzuar si terroristë. Gjurmët e luftimeve dallohen nga larg te Lagjja e Trimave, lagje që maqedonasit i referohen si Divo Naselje.
Qeveria deklaroi të dielën dhe të hënën ditë zie për policët e vrarë – që të gjithë anëtarë të njërisë Tigrat.
Disa qindra njerëz nga kjo lagje u panë rreth zonës së luftimeve pranë pikave të kontrollit të policisë. Policia e ka izoluar zonën dhe nuk lejoi askënd të që hyjë.
Shumica e tyre qenë shqiptarë që po prisnin për të parë se kur do të mund të kthehen në shtëpi. Ata thanë se nuk kanë dalluar asgjë të pazakontë deri sa filluan luftimet.
“Ne e njohim njëri-tjetrin shumë mirë dhe do ta kishim parë nëse do të vinte ndonjë terrorist,” i tha një burrë BIRN. “Çdo gjë dukej normale deri ditën e djeshme.”
Idriz Sinani dhe familja e tij po pret për të dëgjuar se kur do të mund të shkojë të shikojë shtëpinë e tij. Ai tha se mendonte se sulmi qe një “incident i sajuar” nga kryeministri Gruevski dhe partneri i tij në koalicionin qeveritar Ali Ahmeti.
Të tjerë thanë se ka shumë banorë që nuk janë evakuuar nga zona e luftimeve dhe se shumë njerëz kanë mbetur në shtëpi, përfshirë të moshuar dhe gra shtatzëna. Aktualisht në lagje është ndërprerë furnizimi me energji elektrike. Në Kumanovë është njoftuar mbyllja e shkollave të hënën ndërsa autoritetet vendore kanë vendosur fonde për strehimin dhe ushqimin e të shpërngulurve.
Këto trazira në Maqedoni erdhën ndërkohë që vendi është përfshirë nga një krizë politike pasi opozita zbuloi se kryeministri Nikola Gruevski ka urdhëruar përgjime të paligjshme të rreth 20 mijë njerëzve.
Mes protestave antiqeveritare që kërkojnë dorëheqjen e Gruevskit, disa vëzhgues, përfshirë udhëheqësin e partisë socialdemokrate në opozitë Zoran Zaev, ngritën dyshimet se autoritetet mund të kenë orkestruar një kryengritje etnike për të hequr vëmendjen nga protestat kundër qeverisë.
Grupimet e të drejtave të njeriut akuzuan ndërkohë autoritetet se kanë arrestuar pa të drejtë nëntë aktivistë studentë duke i vendosur ata nën arrest me argumentin se kanë marrë pjesë në një protestë të dhunshme më 5 maj.
Zdravko Saveski, nga lëvizja majtiste Solidariteti tha se studentët kishin “protesuar në mënyrë paqësore” më 6 maj dhe se provokatorët e dhunës që ndodhi para ndërtesës së qeverisë nuk qenë arrestuar. Policia keqtrajtoi protestuesit në qendër të Shkupit atë natë.
Saveski tha se qeveria e lodhur “po e kuptonte se propaganda e saj nuk funksiononte dhe se po përdorte frikësimin dhe dhunën… Ne po shohim instalimin e një diktature fashiste në Maqedoni,” tha ai. “Protesta do të vijojë.”
Ndërkohë, Ministria e Jashtme e Rusisë mbështeti qeverinë nacionaliste të Gruevskit duke akuzuar opozitën dhe “organizatat e frymëzuara nga perëndimi” se po përpiqen të destabilizojnë vendin.
“Shpërthimi i aktiviteteve anti-qeveritare në Maqedoni përgjatë ditëve të fundit është shqetësues,” deklaroi Moska.
“Zgjedhja e shumë lëvizjeve opozitare dhe të OJQ-ve të frymëzuara nga Perëndimi, të cilat favorizojnë logjikën e rrugës dhe të skenarit të njohur të ‘revolucionit paqësor’ është përplot me pasoja të rrezikshme,” tha Moska duke iu referuar të ashtuquajturit Revolucioni i Portokallinjtë në Ukrainë.
Mesazhi i Moskës është i ngjashëm me qëndrimin e qeverisë Gruevski, e cila akuzon opozitën se ka bashkëpunuar me “shërbime sekrete të huaja” për të destabilizuar Maqedoninë.
Partia në pushtet së fundmi akuzoi drejtpërsëdrejti disa organizata të shoqërisë civile dhe disa aktivistë si bashkëpunëtorë të interesave të të huajve.
Kriza aktuale e Maqedonisë filloi në shkurt kur opozita filloi publikimin e bisedave të zyrtarëve më të lartë të qeverisë, biseda që qenë përgjuar.
Bisedat sugjerojnë se qeveria e Gruevskit ka kryer përgjime ilegale të mbi 20 mijë njerëzve përgjatë viteve të fundit, përfshirë gazetarë, gjykatës, prokurorë, kryebashkiakë apo edhe ministra.
Opozita socialdemokrate ka shpallur se do të organizojë protestën më të madhe deri tani më 17 maj në kërkim të rrëzimit të qeverisë.
