Maqedonia shpall dy ditë zie për policët e vrarë ndërsa deklaratat e Ministrisë së Brendshme të Maqedonisë rezultojnë kontradiktore.
Të shtënat me armë vijuan mëngjesin e të dielës në Kumanovë ku betejat me armë që filluan të shtunën raportohet se kanë lënë të vdekur së paku pesë policë ndërkohë që dhjetëra të tjerë janë të plagosur.
Nata mes të shtunës dhe të dielës qe relativisht e qetë por të shtënat rifilluan rreth orës 7 të mëngjesit të së dielës ndërsa policia gjendet në lagjen e Trimave ku tashmë panorama është ajo e një zone lufte.
Qeveria shpalli të dielën dhe të hënën si ditë zie për policët e vdekur – të cilët raportohen se janë të gjithë anëtarë të njësisë antiterroriste të njohur si Tigrat (ekuivalenti i repartit RENEA në Shqipëri). Maratona e Shkupit që pritej të zhvillohej të dielën u anulua.
Qeveria maqedonase ndërkohë refuzon të thotë nëse në këto luftime ka patur viktima mes civilëve ndërsa disa nga informacionet e shpërndara prej saj rezultojnë të pavërteta.
Ministrja e Brendshme e Maqedonisë Gordana Jankulovska, e përfshirë nga skandali i përgjimeve ku ajo shfaqet si personi që manipulon zgjedhjet apo dhunon opozitën, deklaroi të shtunën në darkë se nuk disponon të dhëna për viktima mes civilëve ndërsa theksoi se forcat e saj të sigurisë po përballen me një grup të rrezikshëm dhe shumë profesional që ka ardhur “nga një vend fqinj” duke refuzuar të thotë se për cilin vend fqinj bëhet fjalë.
Një deputet nga partia VMRO-DPMNE deklaroi në Tëitter se vendi në fjalë është Kosova. Gjithsesi, policia e Kosovës tha se nuk ka vënë re asnjë grupim të dyshimtë në kufi kohët e fundit.
“Deri tani nuk ka pasur asnjë element të dyshimtë që të jetë vënë re duke kaluar kufirin as individë dhe as grupim kriminal”, deklaroi Majori Baki Kelani, zëdhënës i policisë së Kosovës.
Ndërkohë, disa media shqiptare kanë publikuar një deklaratë për shtyp nga një grupim i panjohur me emrin Ushtria Çlirimtare Kombëtare, ku merret përgjegjësia për sulmet. I njëjti grupim ka marrë përsipër përgjegjësinë për disa incidente në të shkuarën në Maqedoni.
Vërtetësia e deklaratës dhe ekzistenca e grupimit nuk janë konfirmuar por në deklaratë thuhet se ata kanë sulmuar policinë “në një luftë për liri dhe dinjitet kombëtar”. Ashtu si deklaratat e mëparshme, ky grupim nuk ka bërë kërkesa të qarta.
Presidenti i Maqedonisë Gjorgje Ivanov bëri thirrje për një mbledhje urgjente të sigurisë kombëtare me pjesëmarrje të zyrtarëve më të lartë si dhe të krerëve të opozitës.
Komisioneri i Fqinjësisë dhe Zgjerimit të Komisionit Europian Johannes Hahn bëri thirrje të shtunën për ndalim të dhunës dhe rikthim te dialogu.
“Jam shumë i shqetësuar nga zhvillimet në Kumanovë dhe humbjet e mundshme të jetëve njerëzore appo për të plagosurit. I kërkoj autoriteteve dhe të gjithë udhëheqësve politikë apo të bashkësive të bashkëpunojnë në mënyrë që të rikthehet qetësia dhe të hetohen tërësisht ngjarjet në një mënyrë objektive dhe transparente brenda ligjit,” tha ai.
Kosova dhe Shqipëria dënuan dhunën dhe bënë thirrje për vetëpërmbajtje ndërsa Serbia dërgoi trupa për të siguruar kufirin mes Maqedonisë dhe Serbisë pranë Kumanovës. Serbia ka thirrur këshillin e vet të sigurimit të dielën.
