Parlamenti maqedonas miratoi të mërkurën dy ministrat e rinj pasi ministrja e brendshme dhe ministri i transportit hoqën dorë, por atmosfera politike vazhdon të jetë jo e mirë.
Deputetët maqedonas mbështetën të mërkurën caktimin e ministrit të ri të brendshëm, Mitko Cavkov, që ishte kreu i Byrosë së Sigurisë Publike dhe ministrit të ri të transportit, Vlado Misajlovski, që drejtonte ndërmarrjen shtetërore të rrugëve.
Votimi u mbajt në mungesë të deputetëve të opozitës që kanë bojkotuar parlamentin që nga zgjedhjet e prillit, të cilat sipas tyre u kryen me mashtrim.
Social demokratët në opozitë thanë se ndryshimi nuk do t’i pengojë ata nga lufta për të përmbysur qeverinë e Nikola Gruevskit, të cilën e akuzojnë për autoritarizëm dhe korrupsion. Zyrtarët nga partia thanë se deputetët e tyre nuk do të rikthehen në parlament për shkak të ndryshimit.
Riorganizimi ndodhi në sfondin e një krize politike që lindi prej pretendimit të opozitës se kryeministri Gruevski dhe kushëriri i tij, shefi i policisë sekrete në largim, Saso Mijalkov, urdhëruan mbikëqyrjen e paligjshme të 20 mijë personave.
Që nga shkurti, opozita ka publikuar biseda të përgjuara mes zyrtarëve të lartë ku qeveria është përfshirë në një gamë të gjerë manipulimesh, abuzimi me drejtësinë dhe mbulim të vrasjes së një të riu nga një oficer i policisë.
Të martën në mbrëmje, tre bashkëpunëtorë kyç të Gruevskit, ministrja e brendshme, Gordana Jankuloska, ministri i transportit Mile Janakieski dhe kreu i policisë sekrete Mijalkov, kushëri i Gruevskit, dhanë dorëheqjen.
Shumë të implikuar në skandalin e mbikëqyrjes, ata shfaqen në shumë prej përgjimeve inkriminuese të publikuara nga opozita.
“Shpresoj që dorëheqja ime do të zgjidhë krizën e ngritur nga opozita me sjelljen e saj antishtetërore,” shkroi Mijalkov në letrën e dorëheqjes.
Dorëheqjet pasuan një fundjavë dramatike të përplasjeve me armë mes policisë dhe një grupi terrorist në Kumanovë. Tetë oficerë policie vdiqën dhe 37 u plagosën në luftime.
