Ali Ahmeti tregoi se ai mbajti kontakt me telefon me personat e armatosur në Kumanovë, të cilët vranë tetë policë të dielën e kaluar, duke u përpjekur t’i bindte ata të dorëzoheshin.
Ahmeti, kryetari i partisë së vogël në koalicionin qeveritar, tha se ai e mori vesh për operacionin policor sapo ai filloi, të dielën e kaluar në orën 05:00, dhe se një nga njerëzit e armatosur të rrethuar nga policia i telefonoi atij, duke i kërkuar të negocionin tërheqjen e tyre nga Kumanova.
Gjatë një interviste për Alsat M TV Ahmeti, kryetari i Bashkimit Demokratik për Integrim, DUI, tha se ai i kishte thënë grupit të dorëzohej.
“Bëra atë që duhej të bëja. I binda të dorëzoheshin, sepse në të kundërt s’do të ishte mirë për asnjë,” tha Ahmeti.
Tetë oficerë policie u vranë dhe 37 u plagosën në një përleshje dy ditore me një grup prej 40 personash të armatosur në qytetin verior me etni të përzierë të Kumanovës.
Përleshja me armë tronditi banorët vendas dhe risolli në mendje kujtime të konfliktit të armatosur në Maqedoni midis kryengritësve shqiptarëve dhe forcave të sigurisë në vitin 2001.
Beteja përfundoi me dorëzimin e 30 personave të armatosur. Policia fillimisht tha se ata kishin vrarë 14 nga personat e armatosur, por më vonë e korrigjoi atë numër në 10.
Ahmeti, i cili në vitin 2001 udhëhoqi kryengritësit e Ushtrisë Çlirimtare Kombëtarë, UÇK, dhe më vonë formoi partinë DUI, tha se ai informoi menjëherë Organizatën për Siguri dhe Bashkëpunim në Evropë, OSCE, dhe kryeministrin Nikolla Gruevski për përpjekjet e tij.
Ai tha se Gruevski nuk besonte se grupi i armatosur do të dorëzohej.
Ahmeti tha se ai kishte disa informacione për arsyen pse grupi i armatosur ishte në Kumanovë atë ditë, por nuk do t’i bënte ato publike derisa të ndihej i sigurt për të vërtetën e plotë.
Ministrja e Jashtme Gordana Jankuloksa, e cila dha dorëheqjen dy ditë pas aksionit të policisë, tha se grupi përbëhej nga terroristë të armatosur qëllimi i të cilëve ishte të sulmonin shtetin dhe të vinin nën shënjestër civilët për të destabilizuar vendin.
Si Jankuloska dhe Gruevski fillimisht këmbëngulën se aksioni i policisë në Kumanovë ishte i suksesshëm.
Raportet e medias thonë se nata e mbrëmshme kaloi paqësisht në qytet, por mungesa e informacionit po krijonte më shumë frikë midis banorëve vendas të traumatizuar.
Shkëmbimi i zjarrit ndodhi në kuadër të krizës politike në vend, e cila vërtitet rreth pretendimeve të opozitës se kryeministri Gruevski ka organizua përgjimin e paligjshëm të më shumë se 20,000 njerëzve.
Gruevski ka këmbëngulur se “shërbime sekrete të huaja” po punonin në bashkëpunim me opozitën për të destabilizuar vendin.
Social Demokratët filluan të bënin publike përgjime bisedash zyrtare në muajin shkurt.
Ata thonë se përgjimet konfirmojnë dyshimet e tyre për keqpërdorimin e pushtetit nga ana e qeverisë, përfshirje vjedhje zgjedhire, ndërhyrje në sistemin gjyqësor dhe media, rregullime tenderash, shantazh dhe futje në kurth të kundërshtarëve politikë. Ata thonë se përgjimet vërtetojnë se qeveria ka mbuluar gjithashtu vrasjen e një të riu nga një oficer policie.
Social Demokratët e opozitës – të cilët e vënë në dyshim versionin zyrtar të ngjarjeve në Kumanovë – gjithashtu thonë se nuk do ta anulojnë protestën kundër qeverisë të programuar për këtë të dielë. Ata thanë se do të bëjnë gjithçka për të siguruar një protestë paqësore dhe të parandalojnë episode dhune nga ana e provokuesve.
Partia në pushtet VMRO DPMNE gjithashtu ka organizuar një kundër-protestë ditën e hënë, duke rritur kështu frikëne dhunës në rrugë.
Ditën e mërkurë, liderët e partive kryesore politike, me ndërhyrjen e ambasadorit amerikan Jess Baily dhe ambasadorit të BE-së Aivo Orav, firmosën një deklaratë kundër dhunës dhe ranë dakord të mblidhen përsëri ditën e hënë.
Ndërkohë, Komiteti maqedonas i Helsinkit për të Drejtat e Njeriut tha se më shumë se 40 protestues, përfshirë edhe studentë, janë arrestuar dhe 14 prej tyre janë ende në paraburgim.
Komiteti akuzoi policinë se ka arrestuar njerëz për të trembur të tjerët nga pjesëmarrja në protestat kundër qeverisë.
