Sipas një studimi të PNUD, gratë në këshillat vendor përballen me pengesa serioze në ushtrimin e funksioneve të tyre.
Gratë këshilltare e perceptojnë përfaqësimin e interesave të grave dhe vajzave si përgjegjësinë e tyre në 93 për qind të rasteve, sugjeron studimi “Forcimi i pushtetit vendimmarrës të grave këshilltare në Shqipëri”, i kryer nga Programi i Kombeve të Bashkuara për Zhvillimin. Në të u përfshinë 186 gra këshilltare nga zonat urbane dhe rurale në 137 këshilla vendorë në 12 qarqet e vendit.
Rreth 68% e grave këshilltare raportuan se nuk ishin të kënaqura me pushtetin e tyre në këshill; 11.86 % e tyre u shprehën se “ndjeheshin të diskriminuara” për shkak të gjinisë dhe 18.29 % u shprehën se “këshilltarët i ndërpresin fjalën kur gratë këshilltare janë duke folur në mbledhjet e këshillave bashkiakë.”
Sipas studimit gratë këshilltare përballen me barriera të shumta strukturore në vendimmarrje, të cilat lidhen me kompetencat e dobëta të këshillave lokalë, kapacitetet të pamjaftueshme fiskale të organeve të qeverisjes vendore, proceset përmes të cilave drejtuesit e partive politike përzgjedhin gratë dhe kufizimet që këta vendosin për vendim-marrësit lokalë.
50.81% e grave këshilltare u shprehën se janë përfshirë në iniciativa kolektive. Gratë këshilltare raportuan që kishin më shumë gjasa të bashkëpunojnë me njëra-tjetrën, kur ata përbënin një numër të konsiderueshëm. Përveç kësaj, 63,78 % e grave këshilltare u shprehën se e kanë ngritur zërin e tyre në këshill për të adresuar problemet me të cilat përballen gratë dhe vajzat në komunitet.
“Gratë kudo kanë nevojë për më shumë demokraci, në politikat lokale, partitë politike si edhe në jetën politike në përgjithësi në mënyrë që të jenë në gjendje të kenë pushtet në vendimmarrje dhe në vendimet të cilat ndikojnë në jetën e grave”, tha gjatë një forumi diskutimi të zhvilluar të premten me zyrtarë të qeverisë, shoqërisë civile dhe partnerë ndërkombëtarë, Koordinatorja e Përhershme e Kombeve të Bashkuara dhe Përfaqësuesja e Përhershme e UNDP-së, Znj. Zineb Touimi-Benjelloun.
“Prania 50% e grave në këshillat e reja bashkiake-ngjarje që i jep vlerën e duhur organizimit të ri dhe kompetencave në rritje të pushtetit vendor,” tha Zv. Kryetarja e Aleancës së Grave Deputete Zj. Mimoza Hafizi.
Ndërhyrjet e aktorëve lokalë, kombëtarë dhe ndërkombëtarë duhet të jenë shumëplanëshe, sugjeroi studimi në kuadër të Programit të Barazisë Gjinore.
