Mbështetësit e opozitës e kaluan natën në kampin me tenda jashtë ndërtesës së qeverisë të dielën, por një protestë pro-qeverisë ka ngritur frikën e përplasjeve në ditën e sotme.
Protestuesit thanë se nuk do të largoheshin nga kampi i tendave deri në dorëheqjen e kryeministrit Nikola Gruevski, të cilin ata e fajësojnë për instalim të një regjimi autoritar në Maqedoni, edhe pse aleatët e kryeministrit planifikojnë një kundër-demonstratë.
“Për sa kohë që ai është gati të mbetet në pushtet, ne jemi gati të qëndrojmë këtu, për sa kohë të duhet,” tha për median të dielën në mbrëmje një nga disa mijëra protestuesit që kaluan natën në një kamp.
Protestuesit filluan të ngrinin tenda jashtë ndërtesës qeveritare pas një proteste katër orë e gjysmë të gjatë anti-qeveri dhe pro-demokraci të dielën, që sipas vëzhguesve tërhoqi 40,000 njerëz.
Pasi një skenë e madhe për tubimin u çmontua, aktivistët ngritën një më të vogël që do të ofrojë argëtim për protestuesit fushues.
DJ luajtën muzikë për kampistët të dielën në mbrëmje ndërsa kryesia e opozitës gjithashtu kaloi natën jashtë me protestuesit.
“Planifikoj të qëndroj këtu deri herët në mëngjes, pasi duhet të përgatitem dhe të shkoj në bisedime me partinë në qeveri… por do të kthehem prap,” tha kreu i Social Demokratëve në opozitë, Zoran Zaev.
Ndërs protesta e së dielës kaloi paqësisht pavarësisht frikës së dhunës pas përplasjes në një protestë të mëparshme këtë muaj, shqetësimet janë ngritur nëse do të ketë dhunë të hënën në mbrëmje kur partia VMRO DPMNE të bëjë një kundër-protestë me qëllim shprehjen e mbështetjes për Gruevskin, i cili ka qenë në pushtet që nga 2006.
Kundërprotesta e quajtur “Për një Maqedoni të fortë” do të mbahet përpara parlamentit, më pak se 800 metra larg nga kampi i opozitës. Autoritetet janë nxitur të bëjnë maksimumin për të parandaluar mbështetësit e dy krahëve politikë të afrohen me njëri-tjetrin.
Si pasojë e përpjekjeve ndërkombëtare për zgjidhjen e situatës, do të organizohen takime të ndërmjetësuara mes Gruevskit dhe Zaevit. Për këtë arsye, Zaev mori mbrapsht pasaportën e tij pasi kjo i ishte sekuestruar nga autoritetet me akuzën e komplotit ndaj zyrtarëve të lartë.
Thirrjet për largimin e Gruevskit vijnë pasi opozita filloi në shkurt publikimin e bisedave të përgjuara që tregojnë qeverinë të përfshirë në disa praktika anti-demokratike.
Gruevski ka këmbëngulur se përgjimet ishin krijuar nga agjenci të huaja të inteligjencës për të destabilizuar vendin.
