Komisioneri i BE për zgjerim Johannes Hahn tha në një konferencë të BIRN se liria e medias në Ballkan është bërë një shqetësim madhor që duhet të zgjidhet urgjentisht.
Hahn tha të premten se liria e medias në Ballkan “mbetet e një shqetësimi të veçantë” për Komisionin Europian – veçanërisht mbi çështjet e pazarllëqeve qeveritare dhe kërcënimeve ndaj pavarësisë së transmetuesve publikë.
“Ne përballemi me sfida të rëndësishme që kanë nevojë të zgjidhen urgjentisht,” tha Hahn në një video adresim në konferencën rajonale të medias së BIRN në Sarajevë.
“Përveç ndërhyrjes qeveritare më shumë përpjekje duhet të bëhen për të siguruar pavarësinë politike dhe financiare të transmetuesve të shërbimit publik, për të forcuar pavarësinë e agjencive rregulluese dhe për të përshpejtuar vetërregullimin funksional,” tha ai.
Komisioneri i BE tha se ai do të vazhdonte t’i nxiste qeveritë në rajon për të bërë progres.
“Ka gjithashtu nevojë të trajtohet presioni ekonomik informal mbi median. Kjo përfshin transparencën e zotërimit të medias dhe parandalimin e përqendrimit të tepërt. E fundit por jo më pak e rëndësishmja, rolet transparente mbi prokurimet e reklamave qeveritare duhet të vendosen,” tha ai.
Hahn tha se liria e fjalës dhe media janë në zemër të procesit të integrimit të BE.
“Fjala e lirë dhe një shtyp i informuar dhe profesional janë thelbësor për shoqërinë demokratike, ato janë themelore për zgjedhjet që qytetarët bëjnë rreth të ardhmes së vendit”, tha ai.
“Pa to, publiku nuk mund të peshojë opsionet dhe të gjykojë liderët; pa to, rriten paragjykime të rrezikshme dhe keqkuptime, që pengon shanset për paqe dhe stabilitet,” shtoi ai.
Konferenca rajonale e medias, e titulluar “Sfidat e Lirisë së Medias” po mbahet si pjesë e festimit të 10-vjetorit të BIRN.
“Uroj dhe falënderoj personalisht BIRN për kontributin e tij të çmuar dhe përpjekjet për lirinë e fjalës dhe medias në Ballkan,” tha Hahn.
“Ju e dini më mirë se unë pushtetin e lirisë së fjalës dhe shtypit kërcënimet komplekse me të cilat përballen vendet tuaja. Në kuadër të kësaj, mbështetja e gazetarisë profesionale dhe trajnimi i gazetarëve është i rëndësisë kyçe. Me synimin për të ndërtuar dhe forcuar një skuadër të dedikuar dhe të lidhur ngushtë gazetarësh në Ballkan, BIRN vepron si një partner i fortë në rajon duke ofruar një shumëllojshmëri mbresëlënëse shërbimesh,” shtoi ai.
Drejtorët e BIRN dhe ekspertët e medias u mblodhën në kryeqytetin e Bosnjës për të diskutuar problemet kyçe të sektorit.
Konferenca nxori një listë rekomandimesh për qeveritë e Ballkanit për përmirësimin e gjendjes së medias në rajon.
Rekomandimet janë një përpjekje e përbashkët nga më shumë se 30 profesionistë dhe ekspertë mediesh që u mblodhën në Sarajevë një ditë përpara në një tryezë të rrumbullakët për lirinë rajonale të shprehjes për të diskutuar të drejtat e punës, financimin shtetëror të medias dhe transmetuesve publikë, tregun mediatik, transparencën e zotërimit të medias dhe përfaqësimin me grupeve të dobëta dhe të margjinalizuara.
Ekspertët u mblodhën në Sarajevë si pjesë e një Forumi të Shoqërisë Civile në Ballkanin Perëndimor, një projekt i përbashkët i Fondacionit
ERSTE, Friedrich-Ebert-Stiftung dhe Instituti Karl Renner, në bashkëpunim të ngushtë me Ministrinë Federale Austriake për Europën, Integrimin dhe Çështjet e Jashtme.
Forumi Shoqëria Civile e Ballkanit Perëndimor ofron një mundësi unike për përfaqësuesit e shoqërisë civile për Europën jug-lindore që të shprehin mendimet e tyre dhe të formulojnë kërkesa konkrete për përfaqësuesit e lartë të Bashkimit Europian, shtetet e tij anëtare dhe qeveritë e shteteve në Ballkanin Perëndimor.
Sugjerimet që do të prezantohen në Sarajevë do të bëhen pjesë e një pakete më të gjerë rekomandimesh nga shoqëria civile në Samitin e Ballkanit Perëndimor në Vjenë, që do të mbahet në gusht.
Samiti është një vazhdimësi e të ashtuquajturit “Proces i Berlinit” që u iniciua në gusht 2014 nga kancelarja gjermane Angela Merkel për të treguar zotim të mëtejshëm politik për zgjerimin e ardhshëm të Bashkimit Europian në Ballkanin Perëndimor.
