Parlamenti miratoi një rezolutë ku kërkon që ish-komandanti Ramush Haradinaj, i cili u ndalua në Slloveni bazuar në një urdhër ndalimi për krime lufte të lëshuar nga Serbia, të lejohet të kthehet në Kosovë.
Foto: Borut Zivulovic/Beta.
Parlamenti i Kosovës miratoi ditën e enjte një rezolutë duke kërkuar rikthimin e komandantit të UÇK-së gjatë kohës së luftës, tani lider politik, Haradinaj, i cili u ndalua në aeroportin Brnik të Sllovenisë bazuar në një urdhër ndalimi të lëshuar nga Serbia dhe Mali i Zi në vitin 2004.
“Rezoluta kërkon që qeveria dhe presidentja t’i kërkojnë urgjentisht autoriteteve sllovene që ish-kryeministrit të Kosovës, kreut të Aleancës për Ardhmërinë e Kosovës (AAK) dhe deputetit aktual në Kosovë, t’i jepet përsëri pasaporta e tij dhe pa kushte dhe që ai të mund të kthehet përsëri në vend,” thuhej në tekstin e rezolutës të lexuar nga Donika Kada-Bujupi, një deputete e AAK-së.
Rezoluta e ditës së enjte bëri gjithashtu thirrje që të gjithë urdhrat e ndalimit nga Interpoli kundër ish-luftëtarëve të UÇK-së që të hiqen dhe që qeveria e Kosovës t’i dërgojë një notë proteste autoriteteve sllovene.
Por Ministri i Jashtëm Hashim Thaçi i kërkoi legjislaturës të rimendojë mirë çdo veprim që mund të rrezikojë marrëdhëniet diplomatike me Slloveninë.
“Sllovenia nuk veproi drejtpërdrejt kundër nesh apo kundër Kosovës … Problemi është në Beograd, jo në Lubjanë,” tha Thaçi në parlament.
Haradinaj u arrestua të mërkurën me një urdhër arresti ku citohen akuza serbe se ai ka kryer krime gjatë konfliktit të viteve 1998-1999.
Një seancë dëgjimore u përcaktua për ditën e enjte në mëngjes, por Haradinaj tha në linjë telefonike për BIRN se deri tani nuk ishte marrë asnjë vendim mbi mbajtjen apo lirimin e tij.
“Sot s’është vendosur asgjë. Po presim përgjigjen e gjykatave sllovene,” tha Haradinaj, i cili këmbënguli se urdhri për ndalimin e tij nuk i vlefshme.
Prokuroria serbe e krimeve të luftës aktualisht po e heton Haradinaj në tre çështje, duke e akuzuar atë për vrasjen e të paktën 60 njerëzve.
Kryeministri serb Aleksandër Vuçiç tha të mërkurën se ishte “e çuditshme” që Haradinaj u arrestua vetëm disa ditë para bisedimeve të nivelit të lartë Beograd-Prishtinë në Bruksel dhe e quajti arrestimin një “provokim”.
“Ndoshta është aksidentale, ndoshta unë shoh diçka të çuditshme në të gjithë këtë… Sigurisht që do të ketë shumë presion në anën e Serbisë para 23 qershorit (kur fillojnë bisedimet),” tha Vuçiç.
Ministri i Drejtësisë në Kosovës Hajredin Kuçi tha se ai i ka kërkuar homologut të tij slloven, Goran Klemencic, të sigurojë kthimin e shpejtë të Haradinajt dhe të ketë parasysh “nuancën politike të urdhër arrestit të Serbisë”.
Partia AAK e Haradinajt ndërkohë i ka kërkuar presidentes së Kosovës Atifete Jahjaga t’i bëjë apel autoriteteve sllovene.
“Arrestimi i Haradinajt bazuar në një urdhër arresti të vitit 2004, në një kohë kur të gjitha vendet e tjera në rajon e hoqën nga listat një gjë të tillë, nuk do të kontribuojë në krijimin e marrëdhënieve të mira me çdo vend tjetër në rajon, nxit urrejtje dhe mbi të gjitha nuk sjell drejtësië,” tha Ardian Gjini, një anëtar i AAK-së.
Ish-komandant i UÇK-së u lirua nga akuzat në vitin 2012 nga Gjykata e Hagës për krime lufte gjatë konfliktit të vitit 1998-1999.
Gjykata e mbështetur nga OKB-ja hodhi poshtë akuzat se ai ishte pjesë e një sipërmarrje të përbashkët kriminale për të vendosur kontrollin e UÇK-së në Kosovën perëndimore nëpërmjet kampeve të burgimit, dhe se ai dhe të tjerë ishin përgjegjës për torturimin dhe vrasjen e serbëve dhe shqiptarëve që besohej se bashkëpunonin me serbët.
