Dy ditë pas vrasjes së efektivit të RENEA, hetimet paraprake të Prokurorisë sugjerojnë se grupi i armatosur, i drejtuar nga vëllezërit Aliko synonte “çlirimin” e fshatit nga policia dhe rikthimin e kanabisit në Lazarat.
Prokuroria e Krimeve të Rënda hedh dritë mbi arsyet e përplasjes së grupit të armatosur me Policinë e Shtetit në Lazarat, dy ditë pas vrasjes së efektivit të RENEA, Ibrahim Basha dhe plagosjes së dy kolegëve të tij.
Hetimet paraprake të Prokurorisë sugjerojnë se grupi i të rinjve, shumica të moshës 17-22 vjeç, përgatitej prej 6 muajsh për të sulmuar dhe luftuar forcat e rendit.
“Qëllimi i tyre ishte rikthimi i gjendjes së mëparshme në fshatin e Lazaratit. Donin t’u krijohej mundësia për të kultivuar sërish kanabis sativa” thuhet në kërkesën e Prokurorisë për masë sigurie ndaj Xhuljo Malos, njëri prej të arrestuarve për sulmin.
Mëngjesin e 24 qershorit, një grup i armatosur prej 20 vetësh sulmoi paralelisht tre shërbimet e Forcave të Ndërhyrjes së Shpejtë në fshatin e Lazaratit. Situata e krijuar dhe sulmi i armatosur detyroi Policinë e Gjirokastrës që të kërkonte ndihmën e forcave speciale RENEA nga Tirana.
Në orën 9:00 të mëngjesit më 24 qershor, forcat RENEA dhe policia lokale nisën operacionin për arrestimin e grupit të armatosur që po shkaktonte terror në fshat. Por kundërpërgjigja ishte e menjëhershme nga të rinjtë e rebeluar të Lazaratit.
Tre efektivët e RENEA, Ibrahim Basha, Jetmir Isai dhe Perlat Hamitaj u sulmuan me breshëri plumbash, teksa po udhëtonin me makinë në brendësi të fshatit. Nga sulmi humbi jetën Ibrahim Basha, ndërsa dy kolegët e tij u plagosën.
Policia arrestoi Xhuljo Malon si të implikuar në këtë sulm, ndërsa shpalli në kërkim 21 persona të tjerë, të cilët dyshohej se ishin pjesë e grupit të armatosur.
Prokuroria e Krimeve të Rënda sqaron dy ditë më pas se drejtues të grupit “rebel” të Lazaratit dyshohet se janë vëllezërit Arbion Aliko, 20 vjeç dhe vëllai i tij Albani, 18 vjeç.
Sipas dëshmisë së Xhuljo Malos në policinë e Gjirokastrës, grupi kishte arritur të blinte armë të sofistikuara dhe të stërvitej për një përplasje me forcat e Policisë.
Në dokumentin e Prokurorisë thuhet se makina e Malos ka qenë e mbushur me armë dhe municione në momentin e bllokimit nga policia. Në njoftimin e policisë thuhet se aty u gjetën 3 armë, sasi të mëdha fishekësh të kalibrave të ndryshëm, katër kallëpe tritol, dy radio komunikimi dhe tre qese me kokainë”.
Prej mëngjesit të 24 qershorit, dhjetra forca policie kanë nisur një operacion të gjerë në Lazarat për arrestimin e të gjithë personave të përfshirë në sulmin me armë që shkaktoi vdekjen e punonjësit të policisë, Ibrahim Basha.
Mbi 14 të dyshuar janë ndaluar apo vetëdorëzuar në Policinë e Gjirokastrës, por akuzë është ngritur vetëm ndaj Xhuljo Malos.
Prokuroria e Krimeve të Rënda thotë se po vazhdon veprimet hetimore dhe proceduriale për zbardhjen e plotë të ngjarjes së Lazaratit. Ndërkohë që Policia është vënë në kërkim të dy vëllezërit Aliko, të cilët konsiderohen si organizatorët e sulmit të armatosur kundër forcave të policisë në Lazarat.
