Një ditë para vizitës së Merkel, opozita deklaroi se do t’i jepte fund bojkotit në komisionin e reformës në drejtësi, por mosmarrëveshja për 1 anëtar rikthen ngërçin në proces.
Një ditë para vizitës në Tiranë të kancelares gjermane Angela Merkel, opozita i hapi dritën jeshile reformës në drejtësi, duke deklaruar se ishte e gatshme të zinte karriget e lëna bosh në komisionin e posaçëm parlamentar. Akujt mes opozitës dhe mazhorancës u duk se u shkrinë pas ndërmjetësimit të partnerëve ndërkombëtarë.
Reforma në drejtësi ishte kryefjala e vizitës së Merkelit, e cila tha se mbetet një kusht ende i paplotësuar në detyrat e shtëpisë që Brukseli i ka caktuar Shqipërisë. Por pak orë pas largimit të kancelares gjermane, palët janë kthyer sërish në pozicionet e tyre fillestare.
Komisioni parlamentar për reformën në drejtësi u ngrit më 27 nëntor 2014, me një raport prej 6 anëtarësh për mazhorancën dhe 5 të tillë për opozitën. Partia Demokratike e bojkotoi këtë komision, duke kërkuar minimalisht një numër të barabartë anëtarësh- që pretendon se i fitoi në tryezën e negociatave.
Deputeti i PD, Eduard Halimi i kërkoi të enjten parlamentit të zyrtarizonte 6 anëtarët e opozitës në Komision. Por Partia Socialiste bëri të paditurën, duke pretenduar se nuk kishte dhënë miratim për një pakt që ndryshon raportin e anëtarëve në Komision.
“Rregullat e lojës nuk ndryshojnë në mes të lojës,” tha kryetari i grupit parlamentar të PS, Gramoz Ruçi, duke kërkuar që opozita të zërë 5 vendet e caktuara në komision. Ky qëndrim ktheu mosbesimin mes palëve dhe ngërçin mbi procesin e mëtejshëm të reformës.
Deputeti i PD, Eduard Halimi i tha BIRN se mazhoranca u tërhoq, pasi ajo nuk ka për qëllim të miratojë një reformë cilësore dhe afatgjatë për drejtësinë.
“Qëllimi i saj prej fillimit ka qenë miratimi pa konsultime dhe konsensus i një reforme të tillë,” pretendoi Halimi.
Deputeti demokrat e la megjithatë portën hapur, duke shprehur gatishmërinë për pjesmarrje nëse pakti i arritur me partnerët ndërkombëtarë do të zbatohej.
“Ne jemi të gatshëm të marrim pjesë në këtë reformë për të garantuar transparencën e ndryshimeve të rëndësishme ligjore. Aktualisht jemi në pritje të përgjigjes nga mazhoranca për vendosjen e kushteve të paritetit,” tha Halimi.
Reforma në drejtësi është kushti kyç, që Bashkimi Europian i ka vendosur Shqipërisë për avancimin në rrugën e integrimit. Për shkak të rëndësisë dhe shtrirjes në kohë, zyrtarët e Brukselit kanë bërë thirrje që kjo reformë të realizohet me konsultimin dhe kontributin e të gjitha palëve politike.
Përkah kancelares Merkel, kryeministri Edi Rama premtoi se Shqipëria do ta përmbushte këtë kusht në vjeshtë, kur sipas tij parlamentit do t’i dorëzohet paketa e reformës në drejtësi. “Në fund të vjeshtës së këtij viti, parlamentit do t’i kalojë për miratim një nga reformat më rrënjësore të bëra ndonjëherë në Shqipëri,” deklaroi Rama.
Opozita shqiptare e lexon si shprehje të arrogancës këtë deklaratë të kryeministrit dhe si një rrezik për sistemin e drejtësisë në vend. Halimi i tha BIRN se deri tani është bërë zero punë në këtë drejtim, ndërsa publiku nuk e ka aspak të qartë se si do të ndërhyhet në ligjin për Prokurorinë, atë për KLD-në apo pjesë të tjera të sistemit të drejtësisë.
“Siç e kemi parë dhe në të shkuarën, mazoranca do të justifikohet me mungesën e kohës dhe do t’i kalojë me urgjencë, por pa konsultime dhe konsensus ndryshimet ligjore,” i tha Halimi BIRN.
“Roli ynë është që të garantojmë transparencën për këtë reformë,” shtoi ai.
Paketa e reformës në drejtësi pritet të hartohet nga një numër i madh ekspertësh të pavarur, të cilët po punojnë paralelisht me komisionin e posaçëm parlamentar. Produkti i parë i tyre është një raport voluminoz i gjendjes aktuale të sistemit të drejtësisë, i cili pritet të shërbejë si udhërrëfyes për ndryshimet ligjore të shumëpritura nga Brukseli dhe partnerët e tjerë të Shqipërisë.