Adhuruesit e muzikës po inkurajohen të dhurojnë gjak në këmbim të biletave më të lira për një festival në qytetin Kluzh në Transilvani.
Të frymëzuar nga legjenda e Drakulës, vampiri i historisë horror nga Bram Stoker, organizatorët e festivalit muzikor “Untold” në Transilvani, kanë nisur një fushatë për të inkurajuar dhurimin e gjakut në Rumani.
“Ndërsa Rumania po përballet me një mungesë akute gjaku nëpër spitale, një fushatë e frymëzuar nga kjo legjendë për të tërhequr vëmendjen ndaj një problemi tepër real është mëse e mirëpritur,” tha Bogdan Buta, drejtor i festivalit.
“Me anë të fushatës “Paguaj me gjak “, ne duam të rrinim ndërgjegjësimin mbi këtë nevojë dhe të kontribuojmë në rritjen e numrit të dhuruesve të gjakut në Rumani,” shtoi ai.
Dhuruesit e gjakut në qendrat rajonale mund të marrin bileta më të lira për Festivalin “Untold” deri më 24 korrik Ata që dhurojnë gjak në dy karvanët e makinave në Bukuresht dhe Cluj do të marrin bileta një ditore për në festival.
“Untold”, një festival me muzikë elektro-dance, do të zhvillohet midis 30 korrikut dhe 2 gushtit në Kluzh, në Transilvaninë qendrore.
Në të do të marrin pjesë emra të mëdhenj në skenën muzikore ndërkombëtare elektronike, si: Avicii, Armin Van Buuren, David Guetta, Fedde Le Grande dhe Patrice.
Gjatë viteve të fundit, shumica e spitaleve në të gjithë Rumaninë janë përballur me një mungesë të gjakut, duke qenë se numri i dhuruesve aktivë të gjakut në vend është shumë i ulët.
Sipas Institutit rumun e Transfuzionit të Gjakut, vetëm 1.7 për qind e popullsisë dhuron gjak në mënyrë rutinë, dhe pjesa më e madhe dhurojnë vetëm për të ndihmuar një njeri të afërt.
Transilvania është e njohur si vendi i Drakulës. Historia bazohet në legjendën e Vlad Sunduesit, një princ i cili sundoi një pjesë të Rumanisë në fund të epokës së Mesjetës.
Rreth 500,000 turistë në vit vizitojnë kështjellën Bran, e cila është lidhur me historinë e Stokerit të një njeriu që mbante veshur pelerinë të zezë dhe kishte dhëmbë të mprehtë.
Kalaja ndodhet në malet Karpate, rreth 170 km në veri të kryeqytetit, Bukureshtit.
