Nëntë persona janë arrestuar dhe policia po kërkon ende 27 të tjerë në një operacion të shkallës së gjerë kudo në Maqedoni për të arrestuar të dyshuarit si radikalë islamikë.
Policia maqedonase konfirmoi të enjten se ka arrestuar nëntë persona të dyshuar për lidhje me Shtetin Islamik gjatë bastisjeve në zonat Gazi Baba dhe Kair të Shkupit, si dhe në qytetin e Tetovës, Strukës, Kumanovës dhe Gostivarit.
Të gjithë të arrestuarit janë të dyshuar në rekrutim të militantëve për luftime në Siri dhe Irak dhe për pjesëmarrje edhe vetë në konflikte. Ata janë mbajtur në paraburgim të enjten.
Ndër të arrestuarit është edhe një imam i vetëshpallur nga Shkupi i cili është në konflikt me organizatën e dytë më të madhe në vend Komuniteti Fetar Islamik, IVZ, i cili ka paralajmëruar në të shkuarën rreth radikalizimit në xhamitë e dala nga kontrolli.
27 të dyshuar janë ende të lirë, por shumica e tyre sipas policisë janë ende në zonat e luftimit.
“Fakti që këta njerëz apo grupe kanë marrë pjesë ose janë kthyer nga fushëbetejat, është një tregues se një sulm brenda Maqedonisë është i mundshëm,” tha ministri i brendshëm Mitko Cavkov në një konferencë për shtyp.
Ai tha se policia kishte hyrë në 24 shtëpi, në xhamitë Jaja Pasha dhe Tutunsuz në Shkup dhe në dy OJQ islamike.
“Të gjithë të arrestuarit janë me kombësi maqedonase por me etni të ndryshme,” tha policia.
Në lidhje me arrestimin e imamit Rexhep Memishi, ministri i brendshëm lajmëroi se sipas provave të deritanishme ai është një nga ideologët për rekrutimin dhe koordinimin e rrjeteve terroriste.
Sipas ligjit maqedonas, pjesëmarrja në një organizatë paraushtarake të huaj ose ndihma në çdo lloj mënyre e saj është një akt i dënueshëm. Dënimi minimal me burg për pjesëmarrje në grupe paraushtarake është pesë vjet.
Sipas raporteve të medias, të paktën disa qindra maqedonas kanë shkuar të luftojnë në Lindjen e Mesme.
Ministri i brendshëm tha se kishte informacion se të paktën 19 persona, të gjithë shqiptarë etnikë, janë vrarë në luftime deri më tani.
Rreth një e katërta e popullsisë maqedonase është me origjinë shqiptare, të cilët janë kryesisht myslimanë.