Një valë e re prej rreth 2000 refugjatësh pritet të mbërrijë së shpejti në Preshevë, në kufirin jugor të Serbisë me Maqedoninë, është shprehur Kryqi i Kuq vendas.
Një valë e re refugjatësh pritet të mbërrijë në qendrën e pritjes në Preshevë në Serbinë jugore, tha të martën Kryqi i Kuq atje.
“Për momentin, kemi rreth 500 refugjatë, por sipas informacionit gjatë ditës do të mbërrijnë mbi 2000 të tjerë,” tha Ahmet halimi, Sekretar i Kryqit të Kuq në Preshevë.
Ai shtoi se qendra është gati t’i mirëpresë ata dhe ka mjaftueshëm ushqim dhe ujë për tre deri në katër ditë.
Sipas agjencisë së refugjatëve të OKB, UNHCR, rreth 7000 refugjatë kanë hyrë në Serbi nga Maqedonia në tre ditët e fundit.
Fahmi Mustafa, kryebashkiak i Preshevës, tha se rreth 60,000 persona kanë marrë ndihmë në ushqime dhe produkte higjiene në Preshevë deri më tani.
Pothuajse të gjithë migratët që mbërrijnë nga kufiri me Maqedoninë vazhdojnë rrugëtimin e tyre drejt Hungarisë dhe vendeve të BE-së.
Pritet që të martën në mbrëmje rreth 1000 refugjatë të kalojnë kufirin serb me Hungarinë, duke kërkuar mënyra për të shkuar në shtetet më të pasura në BE.
Ata do të arrijnë me autobusë nga Beogradi në Suboticë në veri, ku do të futen në autobusë në Kanjiza, qytet në kufirin me Hungarinë.
Qeveria hungareze të martën parashtroi një projektligj për të “vulosur” kufirin me Serbinë pas instalimit të një muri përgjatë kufirit në korrik.
“Ligji kriminal do të jetë i ashpër ndaj trafikimit njerëzor, ndërsa procedurat e migrantëve do të mbarohen më shpejt dhe më mirë,” tha Robert Repasi, sekretar në Ministrinë e Drejtësisë në vend.
Aleksandër Vuçiç, kryeministri serb, tha të martën në një intervistë për gazetën gjermane Handelsblatt se Europa duhet të gjejë një zgjidhje për krizën e migrantëve dhe se bllokimet e kufirit nuk do të ndihmojnë.
Rreth 181,000 refugjatë kanë hyrë në Greqi për të vazhduar udhëtimin e tyre nga Maqedonia, Serbia, Hungaria dhe më pas për në Europën perëndimore. Rreth 66,500 refugjatë kryesisht nga Lindja e Mesme kanë hyrë në Serbi këtë vit.
