Liderët austriakë dhe gjermanë e cilësuan samitin e Vjenës si një provë e angazhimit të BE-së në rajon dhe lajmëruan mbështetjen për projektet në infrastrukturë dhe solidaritet për krizën e refugjatëve.
Kancelarja gjermane Angela Merkel tha të enjten në Vjenë se samiti i Ballkanit Perëndimor kishte treguar vullnetin e mirë të BE-së për të mbështetur shtetet e Ballkanit Perëndimor me perspektivë europiane.
Merkel tha se marrëveshjet e fundit midis Serbisë dhe Kosovës të arritura me ndërmjetësimin e BE-së i dhanë shpresë të gjithë rajonit.
Përpara fillimit të samitit, Serbia dhe Kosova nënshkruan katër marrëveshje kyçe në atë që BE-ja e quajti themel për procesin e normalizimit, që ndihmon në rrugën europiane të të dyja shteteve.
Merkel tha gjithashtu se liderët e Ballkanit perëndimor e kanë ndryshuar sjelljen dhe se ishin në gjendje të takoheshin edhe pa ndërmjetësimin e të tjerëve, gjë që është një hap konkret për shpresë në rajon.
Kancelarja shtoi se projektet e miratuara në infrastrukturë në Ballkan do të hapin vende të reja pune, duke frenuar problemin e madh rajonal të papunësisë.
Zëvendës kancelari austriak Reinhold Mitterlehner tha se ishte rënë dakord që BE-ja të japë 600 milionë euro për projekt infrastrukturor në rajon gjatë viteve të ardhshme.
Mes projekteve të përmendura në takim ishte dhe autostrada Nis-Prishtinë-Durrës.
Po ashtu rindërtimi hekurudhor mes kryeqyteteve të Serbisë dhe Bosnjës, do të marrë ndihmën financiare të BE-së.
Mitterlehner tha se 24 projekte të ndryshme infrastrukturore ishin miratuar në takimin e Vjenës, me një vlerë prej 7 miliardë euro, raportoi agjencia serbe e lajmeve Tanjug.
Nëse projektet finalizohen, kjo do të sillte rritje të PBB prej 1 për qind për çdo shtet të Ballkanit Perëndimor dhe do të krijonte në total 200,000 vende të reja pune, sipas liderit austriak.
Fluksi masiv i refugjatëve nga Lindja e Mesme që po kalojnë në Ballkan gjatë rrugës për në Perëndim ishte një çështje e pashmangshme në samit.
Të enjten, doli lajmi i migrantëve të vdekur në një kamion në Austrinë lindore, të cilin Merkel e konsideroi ‘të tmerrshëm’.
Sipas Merkel numri i refugjatëve është më i madh sesa pas Luftës së Dytë Botërore dhe ajo theksoi se njerëzit që e kanë jetën në rrezik duhet të mbrohen/
“Si shtete të BE-së ne jemi gati të ndihmojmë shtetet e Ballkanit Perëndimor të kalojnë krizën e refugjatëve,” tha Merkel sipas agjencisë Beta të lajmeve në Beograd.
Kancelarja gjermane theksoi se çështja e migrimit duhet të zgjidhet shpejt dhe me shpirtin e solidaritetit.
Zyrtarët e Ballkanit Perëndimor e nxitën BE-në të formojë një plan veprimi që t’i ndihmojë ata të përballen me krizën sa më shpejt.
