Zbret në Kuvend debati për skemat korruptive në mbledhjen e borxheve të CEZ, ndërsa akuzat përfshijnë edhe pesë kompanitë e tjera përveç DIA-s së Kastriot Ismailajt.
Kontratat e CEZ Shpërndarje për mbledhjen e borxheve të vjetra dhe dyshimet se përmes tyre është ndikuar vendimarrja e Entit Rregullator të Energjisë kanë përplasur deputetët e opozitës dhe të mazhorancës në Kuvendin e Shqipërisë.
Sipas deklaratave të bëra në foltoren e Kuvendit nga ish-kryeministri Sali Berisha dhe deputeti socialist, Erion Braçe, skema e kompanisë së Kastriot Ismailajt, e ekspozuar në tre investigime të mëparshme nga BIRN është ndjekur edhe nga pesë kompani të tjera, të cilat u kontraktuan nga CEZ Shpërndarje për mbledhjen e paketës prej 430 milionë eurosh të borxhit të vjetër.
Ish-kryeministri Berisha, i përmendur si një ndër “aleatët” e Ismailajt në dëshminë e ish-shefit ekzekutiv të CEZ, Jozef Hejsek mohoi akuzat dhe kërkoi hetim për kryetarin e Kuvendit, Ilir Meta lidhur me këtë çështje.
“Si ministër i Jashtëm, Meta nuk ka pasur asnjë tagër të negocionte me CEZ për asnjë lloj problemi. Ka qenë i ngarkuar ministri i tij Haxhinasto dhe ministria e Financave, por kurrë ndonjë zyrtar i ministrisë së Jashtme,” tha Berisha.
BIRN ka publikuar një raport të zyrës ligjore të OSHEE, Clifford Chance dhe dëshminë e ish-shefit të CEZ, Jozef Hejsek, ku thuhet se Kastriot Ismailaj është rekomanduar si njeri i besuar i Metës tek CEZ Shpërndarje dhe hidhen dyshime se kryetari aktual i Kuvendit mund të ketë përfituar ryshfet.
Ish-kryeministri Berisha deklaroi në Kuvend se avokatja e shtetit shqiptar gjatë qeverisjes së tij ka kallëzuar penalisht Debt International Advisory të Ismailajt dhe pesë kompanitë e tjera që u kontraktuan nga CEZ Shpërndarje për mbledhjen e borxheve.
Ai e quajti megjithatë këtë aferë një korrupsion të vogël, krahasuar me marrëveshjen e firmosur nga qeveria “Rama” me CEZ Shpërndarje.
Berisha u kundërshtua në Kuvend nga deputeti i Partisë Socialiste, Erion Braçe, i cili akuzoi ish-kryeministrin se “kishte ndarë zyrat” me dy prej kompanive që lidhën kontrata me CEZ Shpërndarje për mbledhjen e borxheve të vjetra.
Braçe akuzoi më tej se vendimet e qeverisë “Berisha” kishin favorizuar CEZ Shpërndarjen dhe dëmtuar kompanitë publike, përmes ndryshimeve të çmimit të energjisë nga ERE.
Palët akuzuan njëra-tjetrën për episode të ndryshme të aktivitetit të kompanisë CEZ në Shqipëri dhe ranë dakord që kjo çështje kërkonte një hetim të plotë dhe të gjithanshëm.
Çështja e kompanisë CEZ Shpërndarje u rikthye në vëmendjen e opinionit publik pasi BIRN investigoi mënyrën se si u lidh kontrata me DIA-n e Kastriot Ismailajt, që i kushtoi kompanisë një dëm prej 4.5 milionë eurosh.
Kastriot Ismailaj, i arrestuar prej pak muajsh për mashtrim dhe pastrim parash ka hedhur kompaninë e shpërndarjes së energjisë, OSHEE në gjykatën e arbitrazhit në Vjenë dhe kërkon prej saj 130 milionë euro.
