Katër ditë pasi dorëzoi mandatin për një dënim të drejtësisë italiane, Arben Ndoka kallëzohet penalisht në Prokurori për fshehjen e burimeve të pasurisë së tij.
Katër ditë pasi dorëzoi mandatin e deputetit, Arben Ndoka kallëzohet në Prokurori për fshehje të 1.5 milionë eurove pasuri. Inspektoriati i Lartë i Deklarimit dhe Kontrollit të Pasurive, ILDKPKI deklaroi në një njoftim për median se kallëzimi për Ndokën ishte produkt i një kontrolli të plotë të pasurisë së tij.
“Në përfundim të kontrollit të plotë rezultuan fshehje të pasurive, deklarime të rreme të interesave private dhe mungesë burimesh të ligjshme financiare në shumën rreth 1,5 milion euro,” tha ILDKPKI. Ndoka akuzohet për veprat penale të parashikuara në nenet 257/a/2 dhe 287 të Kodit Penal.
Arben Ndoka, deputet i Partisë Socialiste për qarkun e Lezhës dha dorëheqjen 4 ditë më parë, pas akuzave të vazhdueshme të Partisë Demokratike në opozitë se ai kishte mbi supe një dënim të drejtësisë italiane për shfrytëzim prostitucioni.
Në letrën e tij të dorëheqjes, Ndoka pranoi se kishte qenë i dënuar me 7 vjet e 6 muaj burg në Itali, dënim të cilin e quajti “të padrejtë”. Ky akt erdhi pas arrestimit të një tjetër deputeti të PS, Armando Prenga, i cili u përfshi në një përleshje me armë në Laç fundjavën e kaluar.
Dorëheqja e Ndokës u komentua si një hap në procesin e dekriminalizimit të politikës, ndërkohë që hetimi i ILDKPKI që e akuzonte Ndokën për fshehje të pasurisë ishte një fakt ende i panjohur për publikun.
Në njoftimin për shtyp, Inspektoriati i Deklarimit dhe Kontrollit të Pasurive thotë se Arben Ndoka kishte refuzuar ftesën për të dhënë shpjegime mbi burimin e 1.5 milionë eurove pasuri. Sipas ILDKPKI, ky është rasti i dytë që deputetë të Kuvendit shpërfillin ligjin dhe institucionet ligjzbatuese.
Arben Ndoka nuk është deputeti i vetëm që është kallëzuar penalisht për fshehje pasurie gjatë këtij viti nga ILDKP. Kallëzime të ngjashme për vlera të mëdha parash të pajustifikuara janë bërë edhe për Tom Doshin e Mark Frrokun, ish-ministrin e Financave, Ridvan Bode dhe ish-deputetin Andis Harasani.
sipas ILDKPIK-se kerkesa per sqarime eshte derguar ne date 27;08.2015 – ndersa sipas ligjit 9049 per deklarimin e pasurise subjekti ka 15 dite te pergijgjet nga data e njoftimit. Nuk ju shkon mendja se ILDKPIK eshte nxituar ne procedurat e saj kur nje shkrese do minimalisht dy deri ne tre dite te mberrije ne destinacion?