Maqedonia mund të ndjekë shembullin e Hungarisë dhe të ndërtojë një pengesë kufitare për të ulur numrin e refugjatëve dhe migrantëve, tha ministri i jashtëm.
Maqedonia po merr në konsideratë ndërtimin e një gardhi të ngjashëm me atë të Hungarisë, në kufirin jugor me Greqinë për të ulur numrin e refugjatëve që pritet të vijnë nga Lindja e Mesme dhe Afrika, tha ministri i jashtëm, Nikola Poposki të enjten.
Maqedonia me gjasa do të ketë nevojë “për një lloj mbrojtjeje fizike” në kufirin e saj jugor, tha Poposki në një intervistë me të përjavshmen hungareze Figyelo.
“Nëse e marrim seriozisht atë që Europa po na kërkon të bëjmë, do të na duhet [mbrojtja]. Ushtarë ose një gardh, apo edhe një kombinim i të dyjave,” tha Popski. Ai shtoi se edhe një gardh e ushtarë nuk do të ishte gjithsesi një zgjidhje afatgjatë për krizën e refugjatëve.
Meqënëse numri i refugjatëve që kalojnë kufirin u shtua nga disa qindra në mijëra në mes të gushtit, Maqedonia u ankua për mungesë ndihme nga BE-ja për problemin.
Në dy javët e fundit, numri i njerëzve që hyjnë në vend është rritur në 5000 deri 7000 në ditë. Maqedonia është një rrugë tranzit i sirianëve dhe atyre që duan të vazhdojnë rrugëtimin për Serbi, Hungari dhe Europën Perëndimore.
Megjithatë, kjo është hera e parë që një zyrtar maqedonas ka përmendur ndërtimin e një gardhi, një lëvizje për të cilën Hungaria u kritikua.
Hungaria po ndërton një gardh 175 km të gjatë në kufirin me Serbinë për të penguar hyrjen e migrantëve.
Në intervistën e tij Poposki tha se Maqedonia po bën më të mirën për t’u marrë me refugjatët, por po kritikohet që po ndjek vetëm udhëtimet e BE.
Ai tha se Maqedonia po ndërmerr hapa për kontrollin e kufirit dhe për të ndaluar njerëzit, siç e kërkojnë partnerët europianë, gjë që ka ngjallur reagim të keq ndërkombëtar, duke iu referuar ankesave të Hungarisë.
Në mes të gushtit, policia maqedonase u përpoq pa sukses të ndalojë turmat e njerëzve të hyjnë në kufirin jugor, duke shkaktuar përplasje polici-migrantë. Maqedonia u kritikua për përdorim të dhunës ndaj refugjatëve.
Teksa Maqedonia bëhet gati për më tepër mbërritje, organizatat vendase së fundmi thanë për BIRN se kapacitetet po përmirësohen, por duhet punuar më tepër.
