Dhjetëra studentë u mblodhën përpara parlamentit ditën e enjte për të ngritur zërin kundër reformës në arsimin e lartë, të cilën ata e quajtën si klienteliste.
Protesta e organizuar nga aktivistët e Lëvizjes për Universitetin është e para pas sezonit veror të pushimeve që detyroi studentët të ndalojnë protestat për shkak të shpërndarjes së shumë prej tyre në rrethe.
“Qeveria dhe parlamenti aktual nuk përfaqësojnë më askënd përveç një grushti shteti të sponsorëve që i mbajnë ata në pushtet,” thanë studentët në një deklaratë për shtyp.
“Kjo reformë është shprehje e logjikës tregtare dhe klienteliste të reformave të qeverisë. Reforma mund të kalojë në parlament por do të ndalohet në universitete,” shtuan ata.
Lëvizja për Universitetin, një grupim studentor, ka qenë në ballë të protestave kundër ligjit të Arsimit të Lartë prej një viti e gjysmë.
“Sot jemi të paktë në numër, sepse shumë prej nesh janë të detyruar që të punojnë në mënyrë që të mund të paguajnë tarifat e shtrenjtuara të reformës që do të miratohet,” deklaroi në protestë Mirela Ruko, një aktiviste e Lëvizjes për Universitetin.
Situata u tensionua dhe policia ndërhyri për të sprapsur me forcë studentët pasi u qëllua me vezë drejt Sekretarit të Përgjithshëm i Ministrisë së Arsimit, Plarent Ndreca.
“Policia duhet të ruajë mbarëvajtjen e protestës sonë dhe jo të keqtrajtojë studentët pasi dukshëm parlamenti është ai që duhet dekriminalizuar,” u shprehën aktivistët.
Ditën e sotme në kuvend do të votohet projektligji në arsimin e lartë, i cili një muaj më parë u hodh poshtë nga presidenti i republikës, Bujar Nishani. Edhe opozita e ka kundërshtuar projektligjin.
“Ne protestojmë kundër tarifave që janë bërë të papërballueshme. Bursat që do t’i shkojnë studentëve të nevojë nuk janë të qarta se cila kategori i përfiton. Gjithashtu reforma na i ndërpret studimet në nivelin bachelor sepse studentët e masterit nuk do të përfitojnë bursa,” tha për BIRN, Viktori Çipi, aktiviste e Lëvizjes për Universitetin.
“Ky parlament nuk bën më ligje, por privilegje për një grup të pasurish që janë pronarë tëdiplomoreve private”, tha në protestë Arlind Qorri, pedagog në Universitetin e Tiranës.
Ligji i ri hap mundësinë që universitetet private të deklarojnë veten universitete publike dhe si të tillë, të përfitojnë financime shtetërore të cilat do të mund t’i ndahen atyre nga buxheti i shtetit në forma të ndryshme, si p.sh, fonde për kërkim shkencor.
Studentët kanë paralajmëruar protesta të tjera në vijim.
