Berisha e cilësoi skandalin e CEZ Shpërndarje si “më të madhin e këtyre viteve” dhe kërkoi hetim ndërkombëtar për zbardhjen e plotë të akuzave për kryetarin e Kuvendit, Ilir Meta.
Ish-kryeministri Sali Berisha kërkoi hetim ndërkombëtar për aferën e CEZ Shpërndarje, duke e cilësuar atë “më të madhen e ndodhur në këto viteve”. Në fjalën e mbajtur të enjten në Parlament, Berisha kërkoi edhe hetimin e kryetarit të Kuvendit, Ilir Meta, i cili akuzohet se qëndron pas marrëveshjes së firmosur mes CEZ dhe kompanisë së mbledhjes së borxheve, Debt International Advisory, DIA, e drejtuar nga Kastriot Ismailaj.
“Shqipëria sundohet nga banditizmi.. ka shpërthyer afera më e madhe e këtyre viteve, ajo e CEZ. Kërkoj hetim ndërkombëtar për këtë çështje,” tha ish-kryeministri Berisha.
Duke iu referuar dëshmisë së ish-shefit të CEZ, Jozef Hejsek, Berisha akuzoi Metën se ka negociuar për Kastriot Ismailajn, i cili është arrestuar nga prokuroria për pastrim parash dhe mashtrim. Berisha denoncoi gjithashtu edhe kërcënimin e dëshmitarit të mbrojtur të kësaj çështjeje.
Kontrata mes CEZ Shpërndarje dhe DIA, e cila po hetohet nga Prokuroria si skemë mashtrimi me dëm 4.5 milionë euro u negociua në vitin 2009, kohë kur Meta mbante postin e ministrit të Jashtëm dhe Berisha ishte në krye të ekzekutivit. Por çështja u rikthye në qendër të debatit publik, pas tre investigimeve të publikuara nga BIRN mbi këtë aferë.
Duke iu referuar një raporti që zyra ligjore e OSHEE, Clifford Chance ka dorëzuar në gjykatën e arbitrazhit në Vjenë, dëshmisë së ish-shefit të CEZ, Jozef Hejsek dhe intervistave me ekspertë, BIRN argumetoi se CEZ Shpërndarje kontraktoi kompaninë e Kastriot Ismailajt, me gjasë për të ndikuar politikanët shqiptarë dhe Entin Rregullator të Energjisë.
Ish-shefi i CEZ, Hejsek dëshmoi se kontrata me Ismailajn ishte firmosur, pasi ai u prezantua nga ambasadori shqiptar në Pragë, Qazim Tepshi si “njeri i besuar” i Metës dhe aleat i ish-kryeministrit Berisha.
Sipas dokumenteve, CEZ Shpërndarje i pagoi DIA-s së Ismailajt 4.5 milionë euro për një raport të rremë për mbledhjen e borxheve dhe punë të tjera të pakryera. Sipas zyrës ligjore që mbron interesat e OSHEE-së në arbitrazh, një pjesë e këtyre parave shkruan në xhepat e politikanëve të rëndësishëm dhe zyrtarëve të ERE.
“Brenda transfertave [përfituesve] të lekëve që DIA mori nga CEZ Shpërndarje ishin…politikanë të rëndësishëm shqiptarë, përfshirë një ish kryeministër i proceduar për korrupsion…si dhe një zyrtar i ERE,” shkruan Clifford Chance.
Meta i ka mohuar akuzat, duke deklaruar në parlament se “Shqipëria ka pasur shumë ish-kryeministra”.
Sipas Clifford Chance, përpara se marrëdhënia midis CEZ Shpërndarje dhe Ismailajt të prishej në vjeshtën e 2011, biznesmeni shqiptar arriti të influencojë të paktën një vendim të dyshimtë të Entit Rregullator të Energjisë.
Ky vendim u mor nga ERE në dhjetor të vitit 2010, pasi DIA ishte paguar 1.48 milionë euro nga CEZ shpërndarje, në tre pagesa prej 485,000 euro për raportin fals të identifikimit të debitorëve. Vendimi i marrë nga ERE në dhjetor të vitit 2010 ulte çmimin e shitjes së energjisë nga KESH tek CEZ me 27 për qind; nga 2.03 lek në 1.48 lek.
“Dëmi i shkaktuar në kompaninë shtetërore dhe të subvencionuar KESH nga ky vendim arbitrar vlerësohet në më shumë se 30 milionë dollarë,” argumenton Clifford Chance.