Rreth 25 për qind e popullsisë në vendet e Europës juglindore është larguar sakaq gjatë dy dekadave të fundit. Tani është koha që qeveritë të përpiqen të ndalojnë pasojat negative që ka emigrimi masiv mbi kapitalin njerëzor, thotë Banka Botërore në një raport.
Raporti i fundit mbi rritjen ekonomike që hartohet nga Banka Botërore mbi gjashtë vendet e Ballkanit Perëndimor, i publikuar të hënën (28 shtator) vuri në dukje se rritja ekonomike po rigjallërohet me hapa modestë ndërkohë që theksoi se rajoni po humbet pjesën më vitale të popullsisë së vet si pasojë e emigrimit masiv. Raporti i bën thirrje qeverive të këtyre vendeve të fillojnë të punojnë të parandalojnë emigrimin e mëtejshëm përmes politikave që sjellin ekonomi gjithëpërfshirëse dhe që krijojnë vende të reja pune, si ilaçe kundër plakjes së popullsisë dhe rënies së numrit të banorëve.
“Të gjashtë vendet e Europës Juglindore janë mes rajoneve që prodhojnë më shumë emigrantë në botë,” thuhet në raport. Aktualisht një e katërta e popullsisë së rajonit jeton jashtë vendit të vet. “Përgjatë dy dekadave të fundit, pjese a popullsisë emigrante si përqindje e popullsisë totale të këtyre vendeve është rritur nga 13 për qind më 1990 në 25 për qind më 2013. Që nga fillimi i viteve 1990, fluksi i vazhdueshëm i emigrimit ka hequr nga rajoni 4.9 milionë njerëz,” vëren raporti.
Por ndryshe nga fillimi i viteve 1990, kur refugjatët iknin nga vendet e rrënuara nga lufta në ish-Jugosllavi, në dekadën e fundit kanë dominuar emigrantët që largohen për arsye ekonomike.
“Rritja e ngadaltë ekonomike që nga kriza e vitit 2008, papunësia shumë e lartë e vazhdueshme, të ardhurat sa vetëm një e treta e mesatares së BE-së si dhe dobësitë përballë tronditjeve të jastme dhe katastrofave natyrore kanë penguar gjenerimin e të ardhurave në rajon. Për rrjedhojë, njerëzit vijojnë të emigrojnë në kërkim të mundësive më të mira ekonomike. Shumica e emigrantëve janë të rinj, nga forca aktive e punës dhe në përgjithësi me nivel arsimor më të lartë se sa i njëjti grup moshe në vendet nisëse,” shton raporti.
Raporti i Zhvillimeve Ekonomike të Bankës Botërore mbulon Shqipërinë, Maqedoninë, Kosovën, Malin e Zi, Serbinë dhe Bosnjë Hercegovinën. Raporti publikohet dy herë në vit.
Të gjitha vendet e rajonit kanë përjetuar një valë të re emigrimi drejt Europës Perëndimore përgjatë vitit të fundit, por numri i emigrantëve ka qenë jashtëzakonisht i lartë në Shqipëri dhe Kosovë.
Numri i azilkërkuesve të regjistruar në Gjermani nga rajoni ynë u trefishua këtë vit në 78 mijë vetë përgjatë gjashtë muajve nga janari në qershor 2015 në krahasim me të njëjtën periudhë të vitit të kaluar.
Nga Shqipëria, deri në gusht të këtij viti në Gjermani u regjistruan 38,245 azilkërkues ndërsa nga Kosova u regjistruan 33.824 vetë. Përveç këtyre, azil kërkuan edhe 20,864 serbë, 10,244 maqedonas etj.
“Kjo tregon se vendet e rajonit duhet të ndërmarrin politika për të ndaluar ndikimin negativ të transformimit demografik që po ndodh në vendet e tyre, veçanërisht plakjen e popullsisë dhe zvogëlimin e shoqërive,” thuhet në raport.
“Duke krijuar incentiva për pjesëmarrje më të madhe në forcën e punës, investimin në kapitalin njerëzor, ndalimin dhe përmbysjen e tendencës së emigrimit të lartë dhe krijimi i mundësive për gjenerim të ardhurash në shtëpi do të ndihmojë në inkurajimin e të rinjve të qëndrojnë në atdhe ose të rikthehen nga emigrimi,’ deklaroi Ellen Goldstein, Drejtoreshë e Bankës Botërore për rajonin, “duke trajtuar në këtë mënyrë jo vetëm sfidën e plakjes së popullsisë por edhe duke rritur cilësinë dhe sasinë e kapitalit njerëzor në Ballkan,” shton ajo.