Maqedonia thotë se po përballet me rritjen më të lartë në mbërritjen e refugjatëve që nga fillimi i krizës, me rreth 10,000 njerëz që përpiqen të hyjnë dhe të kalojnë kufirin çdo ditë gjatë rrugës për në perëndim.
Teksa më shumë se 10,000 refugjatë dhe migrantë nga shtetet e Lindjes së Mesme filluan të mbërrijnë në Maqedoni për të dytën ditë dhe më shumë janë rrugës, autoritetet thonë se kapacitetet po shtyhen drejt limitit.
“Të gjitha përpjekjet tona janë tani të përqendruara në rregullimin e procesit administrativ në mënyrë që mbërritjet e reja të vazhdojnë tranzitin e tyre përgjatë vendit sa më shpejt që të jetë e mundur”, tha për BIRN Qendra e Menaxhimit të Krizës, trupi që koordinon aktivitetet në terren.
Punonjësit humanitarë thonë se policia nuk do të humbasë më kohë në lëshimin e vizave 3-ditore tranzit për refugjatët që mbërrijnë në grupe të mëdha në kufirin jugor me Greqinë.
Në vend të kësaj, pas një pushimi të shkurtër, ata do t’i ngarkojnë ato në trena dhe në autobusë për të vazhduar udhëtimin më tej drejt Serbisë veriore dhe më pas në vendet e BE-së, me shumë gjasa në Gjermani.
“Ne po presim rreth 20,000 njerëz të mbërrijnë në kufi në ditët e ardhshme… Kjo na ka çuar drejt limitit por ne po ia dalim,” tha zëdhënësi i policisë Ivo Kotesvki.
Deri disa ditë më parë, numri i refugjatëve u shtua nga 2-3000 mijë në ditë në 5-7000.
Megjithëse njerëzit nuk qëndrojnë gjatë në kampin tranzit në Gevgelija, pranë kufirit me Greqinë, për punonjësit humanitarë ka shumë për të bërë.
Mes të tjerave, ata përgatisin njerëzit me dëmtime nga udhëtimi i gjatë, i japin paketa ushqimi dhe këshillim psikologjik dhe ligjor për familjet.
“Gjatë verës, ushqimi dhe uji, si dhe higjiena ishte urgjenca jonë më e madhe. Tani, teksa ka ardhur vjeshta, jemi të përqëndruar te veshjet e ngrohta dhe vendet e thata për pushim,” tha OJQ-ja Legis. Legis është mes organizatave më aktive në Maqedoni që ndihmon refugjatët në terren.
Ndërsa numri i njerëzve në kufij po rritet, Maqedonia mund të mbështetet në 24 milionë eurot ndihmë institucionale nga BE-ja.
Komisioni Europian tha të martën se paratë do të shkojnë për rinovimin e stacioneve policore të kufirit maqedonas, në luftën kundër trafikimit njerëzor dhe forcimin e kapaciteteve të policisë për menaxhimin e kufirit.
Ndërsa Maqedonia, dhe rajoni, përballen me dyndjen më të madhe të refugjatëve deri tani, presidenti Gjorge Ivanov të mërkurën kritikoi BE-në se nuk po bën shumë për të ndarë barrën.