Dy ish-zyrtarët akuzohen për shpërdorim detyre me dëm 3.4 milionë euro në procedurat e shitjes së katër hidrocentraleve shtetërore në vitin 2013.
Ish-Ministri i Ekonomisë dhe Energjisë Florjon Mima dhe ish-zëvendësministri Enno Bozdo u kallëzuan të hënën (12 tetor) në Prokurori për veprën penale të Shpërdorimit të Detyrës nga Ministria e Energjisë, e cila tha se të dy titullarët kanë shkelur ligjin gjatë procedurave të shitjes së katër hidrocentraleve në vitin 2013.
“Nga auditimi është evidentuar se ish titullarët e Ministrisë Ekonomisë, Tregtisë dhe Energjitikës, Ministri Florjon Mima dhe Zv. Ministri Enno Bozdo kanë konsumuar elementët e veprës penale të shpërdorimit të detyrës çka i ka shkaktuar Buxhetit të Shtetit një dëm 3.4 milion euro,” deklaroi Ministria e Energjisë sot.
“Nga përllogaritjet e kryera nga auditimi, përveç parregullsive në procedurë, rezulton se blerësi duhet të paguante vlerën e rregullimit prej rreth 3.4 milion Euro për HEC Ulëz-Shkopet, shumë e cila përbën dëm ekonomik për interesat e shtetit dhe përfitim të pa drejtë për blerësin. Deklarata e përfundimit të shitjes për këtë HEC është nënshkruar nga ish zv. Ministri Enno Bozdo. Për Hec Bistrica 1 dhe 2 nuk rezulton të ketë vlerë rregullimi në çmimin e shitjes,” thuhet në njoftim.
Qeveria e kaluar shiti katër hidrocentralet në dhjetor 2012 te kompania Kurum për 110 milionë euro, një vendim i shumëkritikuar në atë kohë për shkak se rentabiliteti ekonomik i të katër hidrocentraleve është i jashtëzakonshëm dhe çmimi i shitjes u konsiderua shumë i ulët. Të katër hidrocentralet prodhojnë mesatarisht 400 mijë megavat/orë në vit dhe kanë fuqi të instaluar prej 80 MW. Argumentohet se nëse qeveria dëshiron të ndërtojë hidrocentrale të ngjashme, atëherë këto hidrocentrale mund të kushtojnë mbi 4 mijë euro për kWh fuqi të instaluar ndërsa çmimi i shitjes së katër hidrocentraleve qe tri herë më i ulët.
Qeveria aktuale ka dërguar kallëzime në prokurori për disa ish-ministra të qeverisë paraardhëse por deri më sot, asnjë prej këtyre kallëzimeve nuk ka qenë i suksesshëm.
Ish-Minstri i Mbrojtjes Arben Imami u kallëzua në prokurori nga qeveria aktuale në vitin 2013, por në vitin 2014, Ministria u tërhoq nga beteja gjyqësore.
Në prill 2015, Ministria e Arsimit kallëzoi ministrin paraardhës Myqerem Tafaj, i cili pritet të shfaqet në gjyq së shpejti.
Në tetor 2014, ish-ministri i Financave Ridvan Bode dhe zëvendësi i tij Sherefedin Shehu u kallëzuan nga ministria e Financave, por çështja e tyre nuk ka ecur më tutje.
