Banda e rrokut “Laibach” ka kërcënuar të padisë një parti kroate të krahut të djathtë se ka përdorur një nga këngët më të njohura të grupit muzikor në një video promocionale.
“Laibach” tha ditën e enjte se ata do të ngrenë një padi për shkelje të të drejtave të autorësisë kundër partisë së krahut të djathtë Kuvendi Demokratik Kroat i Sllavonisë dhe Baranjës, partia HDSSB, pasi përdori pa leje këngën e tyre me titull “Geburt einer Nation” në një video promocionale.
HDSSB-ja, presidenti i të cilës është i dyshuari kroat për krime lufte Branimir Glavas, e përdoruri këngën nga albumi i vitit 1987 i grupit “Laibach” “Opus Dei” në një video për të promovuar një grup të rinjsh të partisë të veshur me uniformë të quajtur “Slavonian Hawk Guard”.
Videoja e “Slavonian Hawk Guard” me këngën në sfond u shfaq gjatë një mitingu të partisë, por u transmetua gjithashtu nga televizioni lokal dhe kështu u bë publike dhe subjekt i akuzave për shkelje të të drejtës së autorësisë.
Garda u shfaq për herë të parë në një video të realizuar nga gazeta kroate “24 Sata”, e cila tregoi një grup të rinjsh të veshur me uniforma të zeza duke mbajtur flamut partiakë, kroatë dhe rajonalë.
Stërvitja e tyre u mbikëqyr nga Glavasi, i cili u lirua nga burgu në janar për shkak të çështjeve proceduriale në gjyqin e tij për krime lufte kundër civilëve serbë në Osijek në Kroacinë lindore në vitin 1991. Aktualisht ai po pret rigjykimin.
Glavasi ka këmbëngulur se “Slavonian Hawk Guard” nuk është “një ushtri partiake”, por një grup sportiv dhe skuadër argëtimi, e cila do të kujdeset gjithashtu për sigurinë në festa dhe mitingje të partisë.
“Laibach” tha se HDSSB nuk i kërkoi leje apo pagoi për të përdorur këngën e tyre.
Grupi muzikor tha se ata kishin lajmëruar pronarin e të drejtave të këngës në Kroaci, shërbimin shtetëror për mbrojtjen e të drejtave muzikore, ZAMP.
“Ata (ZAMP) janë të parët të cilëve u kërkohet të marrin masa ligjore për përdorimin e paligjshëm të këngës dhe të marrin në konsideratë mundësinë e padive. Një nga krijuesit e videos së HDSSB-së e përdori këngën në mënyrë të paligjshme, duke injoruar ose mos ditur legjislacionin e të drejtave të autorësisë,” tha “Laibach”.
Presidenti i HDSSB-së Dragan Vulic tha për mediat ditën e enjte se ai “nuk kishte marrë pjesë në krijimin e videos”.
Deputeti i HDSSB-së Ivan Drmic tha se partia ia paguan të gjitha tarifat ZAMP-it, por se videoja e “Slavonian Hawk Guard” nuk ishte “prezantuar kurrë publikisht”.
“Nëse ata ndiejnë se i dëmtuam, u kërkojmë ndjesë. Shpresoj të mos merret në konsideratë një padi, duke qenë se nuk ka elemente për të nisur një të tillë,” tha ai.
Megjithatë ZAMP tha se HDSSB kishte paguar “për të luajtur muzikë në një vend publik”, por thekson se këtu nuk përfshihet përdorimi i këngës për një video.
“Për ta përdorur muzikën në një punë të re audio-vizive, autori i veprës audio-vizive duhet të kërkojë lejen e kompozitorit,” tha ZAMP.
“Laibach” u bë i njohur në fillim të viteve 1980 për rezistencën e tyre kulturore ndaj tendencave censuruese dhe totalitare në Jugosllavinë socialiste.