Komuniteti LGBTI në Shqipëri përballet ende me diskriminim dhe institucionet shtetërore duhet të bëjnë më shumë për të ndërgjegjësuar thonë organizatat, ndërsa progres-raporti cilësohet si konstatues dhe jo këshillues.
Në progres-raportin e këtij viti për Shqipërinë, Komisioni Europian trajtoi ndër të tjera çështjen e të drejtave themelore të njeriut,e në veçanti të Komunitetit LGBTI.
Sipas raportit, parlamenti shqiptar ka aprovuar në maj një rezolutë për mbrojtjen e të drejtave dhe lirive të këtij komunitetit dhe ka bërë Avokatin e Popullit përgjegjës për monitorimin e zbatimit të tyre.
Gjithashtu raporti vlerëson eventet e ndërgjegjësimit të publikut ndaj personave të komunitetit LGBTI, por thekson se ende ky ndërgjegjësim mbetet i pakët. Në të vlerësohet gjithashtu mbajtja pa incidente e eventit të dytë Tirana Pride në qershor, por nënvijëzohet se Shqipëria duhet të eliminojë nga legjislacioni i saj diskriminimin ndaj personave transeksualë dhe interseksualë.
Duke komentuar për raportin e Komisionit Europian, përmes një deklarate të përbashkët për shtyp, Aleanca Kundër Diskriminimit LGBT dhe ProLGBT, dy organizata kryesore në fushën e mbrojtjes së të drejtave të komunitetit LGBTI në Shqipëri u shprehën se “paragrafi që flet për të drejtat e komunitetit LGBTI është një paragraf me një gjuhë të përgjithshme që nuk i adreson plotësisht problemet por dhe mënyrën e zgjidhjeve të tyre”.
“Ndër problemet më të mëdha me të cilat haset komuniteti LGBTI në Shqipëri është dhuna në familje, por edhe moszbatimi i ligjit kundër diskriminimit,” tha për BIRN Kristi Pinderi, kryetari i organizatës ProLGBT.
“Kemi nevojë për ndihmë institucionale në ndërgjegjësimin e publikut për mosdiskriminimin e personave të komunitetit LGBTI dhe kjo mund të bëhet vetëm përmes një fushate kombëtare shtetërore,” shtoi ai.
Prekja sipërfaqësore e të drejtave themelore të njeriut nga progres-raporti ka tërhequr kritika edhe nga grupet e mbrojtjes së të drejtave në Shqipëri.
“Raporti ka një frymë konstatuese më tepër se sa kritikuese ndaj problematikave të Shqipërisë në lidhje me grupet e marxhinalizuara,” tha për BIRN Vasilika Laçi, përfaqësuese e Civil Rights Defenders në Shqipëri.
“Ky është një rast i humbur për të theksuar realitetin dhe gjendjen e vështirë ku ndodhen sot këto grupe,” shtoi Laçi.
