Policia në Itali dhe Kosovë arrestoi katër të dyshuar si militantë islamikë me akuzat e kërcënimeve për sulm ndaj papës dhe ish-ambasadorit amerikan në Prishtinë.
Tre burra u arrestuan në Itali dhe një në Kosovë të martën në një operacion të përbashkët të hartuar nga policia e Kosovës dhe homologët italianë pasi të dyshuarit postuan foto të tyret me armë në faqen e Facebook dhe bënë kërcënime kundër Papës Françesk dhe diplomatit amerikan.
Policia e Kosovës tha se sekuestroi një pistoletë dhe një pushkë gjatë mësymjes në fshatin Elez Han pranë Kaçanikut në jug të vendit, si dhe disa pajisje elektronike dhe mjete të tjera që mund të lidhen me çështjen.
“Armët e zbuluara në Kosovë tregojnë se ata mund të kishin vepruar [sipas kërcënimeve],” tha për Associated Press Giovvani De Stavola, kreu i zyrës së kundërterrorizmit në qytetin italian të Breshias.
Policia e Kosovës tha se nuk do të jepte më shumë detaje për burrin e arrestuar për shkak të hetimit në vijim.
“Ky operacion është një tregues se bashkëpunimi ndërkombëtar është i domosdoshëm në luftën kundër terrorizmit si dhe një faktor kyç i investigimit,” tha policia në një deklaratë.
Associated Press raportoi se të katërt burrat kishin vizituar shpesh një grup islamik militant në Facebook dhe kishin postuar komente online duke mbështetur sulmet e fundit terroriste të Shtetit Islamik në Paris.
Gjatë dy javëve të fundit, policia e Kosovës ka vendosur patrulla policie dhe ka intensifikuar kontrollet e individëve dhe makinave në kufi prej frikës në rritje të sulmeve terroriste.
“Bazuar në vlerësimet e fundit, masat e sigurisë në vend janë rritur,” tha zëdhënësi i policisë, Baki Kelani për BIRN të martën.
Rreth 40 fanatikë islamikë përfshirë imamë dhe ish-luftëtarë në Lindjen e Mesme janë në gjyq në Kosovë pas një aksioni që zgjati nga vjeshta 2014 deri në pranverën 2015.
Më shumë se 200 luftëtarë nga Kosova raportohet se kanë hyrë në radhët e Shtetit Islamik dhe Al Nusrës në Siri dhe Irak.