Ambasada amerikane në Tiranë ka mirëpritur vendimin e Gjykatës së Krimeve të Rënda për dënimin me 59 vjet burg të një organizate të trafikut të qënieve njerëzore, që kontrabandoi mbi 600 shqiptarë drejt SHBA.
Vendimi i Gjykatës së Krimeve të Rënda për dënimin me 59 vjet burg të një grupi të trafikut të qënieve njerëzore është mirëpritur nga ambasada e Shteteve të Bashkuara në Tiranë. Grupi kriminal prej 5 personash trafikoi qindra njerëz nga Veriu i Shqipërisë përmes Meksikës, drejt Shteteve të Bashkuara të Amerikës.
Në një njoftim të publikuar në faqen e saj në Facebook, ambasada amerikane deklaroi se organizata kriminale është përgjegjëse për trafikimin e paligjshëm në SHBA të më shumë se 600 shtetasve shqiptarë.
“Ajo shfrytëzoi shpresat dhe ëndrrat e emigrantëve të mundshëm, duke i vënë ata në rrezik ndërsa siguroi mbi 15 milionë dollarë si të ardhura kriminale,” thuhet në deklaratën e ambasadës së SHBA.
Të enjten, Gjykata e Krimeve të Rënda dënoi me 59 vjet burg pesë anëtarët e kësaj organizate, të cilët akuzoheshin për veprat penale të “ndihmës për kalim të paligjshëm të kufirit” dhe “grupit të strukturuar kriminal”. Sipas vendimit, Nertil Previzi nga Maqedonia u dënua me 11.6 vjet burg, Fatos Fasko me 14 vjet burg, Enver Karaj me 13 vjet burg, Fatmir Bakalli me 11.6 vjet burg dhe Nikoll Kolaj me 9 vjet burg.
Në një investigim të mëparshëm, BIRN zbuloi se qindra shqiptarë nga Malësia e Madhe dhe Shkodra kishin ndjekur një itinerar të gjatë përmes vendeve të Amerikës Latine për të mbërritur si klandestinë ilegalë në Shtetet e Bashkuara. Investigimi shpjegonte se trafikantët e qënieve njerëzore merrnin 25 mijë dollarë për njeri, në momentin e mbërritjes në Amerikë.
Një numër i madh të rinjsh nga komunat e Kastratit dhe Kelmendit në Malësi të Madhe u trafikuan në Shtetet e Bashkuara nga grupi i mësipërm përgjatë viteve 2013-2014. Grupi i trafikantëve u siguroi atyre pasaporta bullgare të falsifikuara dhe i shoqëroi ata në vende të ndryshme të Europës deri në Spanjë, prej nga niste fluturimi drejt vendeve të Amerikës Latine.
Gjatë hetimit të saj, Prokuroria e Krimeve të Rënda ka arritur të vërtetojë se shqiptarët arrinin në Meksiko ose në Kankun, ku falë lidhjeve meksikane të Fatos Haskos dërgoheshin në kufi me Amerikën për të kaluar ilegalisht.
Ambasada e Shteteve të Bashkuara thotë se vendimi i Gjykatës së Krimeve të Rënda është rezultat i një hetimi të përbashkët mes Byrosë për Sigurinë Diplomatike të Departamentit të Shtetit, në bashkëpunim të ngushtë me policinë dhe prokurorinë shqiptare.
“Kontrabandimi i emigrantëve është një krim i rëndë dhe Shtetet e Bashkuara janë të angazhuara të ndjekin penalisht kontrabandistët sipas të gjitha hapësirave të ligjit amerikan dhe atij shqiptar,” tha ambasada amerikane në Tiranë.