Njeriu që udhëhoqi Kishën Katolike shqiptare që nga rënia e Komunizmit u nda nga jeta në Tiranë më 7 dhjetor 2015 në moshën 75 vjeçare.
Arqipeshkvi i Tiranës dhe i Durrësit dhe Primati i Kishës Katolike shqiptare Imzot Rrok Mirdita u nda nga jeta mesditën e 7 dhjetorit 2015, nga një hemorragji cerebrale, ndërsa gjendej i shtruar në Qendrën Spitalore Universitare Nënë Tereza në Tiranë, bëri të ditur Arkidioqeza Metropolitane Tiranë-Durrës në një njoftim për shtyp. Mirdita qe 75 vjeç.
I lindur në Këllezen pranë Ulqinit në Malin e Zi në vitin 1938, Mirdita u shugurua meshtar në vitin 1965 dhe shërbeu për disa vite në Dioqezën e Tivarit deri në vitin 1973, kur u dërgua në Nju Jork për të shërbyer për komunitetin e shqiptarëve të Amerikës.
Pas rënies së komunizmit në Shqipëri dhe rihapjes së objekteve të kultit, Papa Gjon Pali i II e emëroi Rrok Mirditën Arqipeshkëv të Durrësit dhe Tiranës. Ai u shugurua Ipeshkëv gjatë vizitës së Papës Gjon Pali i II në Shqipëri në vitin 1993, sëbashku me tre priftërinj që i patën mbijetuar komunizmit, Zef Simoni, Frano Illia and Robert Ashta.
Mirdita qe personi që udhëhoqi ringritjen e Kishës Katolike në Shqipëri pas rënies së komunizmit, ringritje të cilën ai refuzoi ta quajë “ringjallje”, duke argumentuar se në fakt, pavarësisht kalvarit komunist, kisha nuk pati vdekur kurrë në zemrat e shqiptarëve.
Ai qe drejtuesi që mbikëqyri punimet për ndërtimin e Katedrales së Shën Palit në Tiranë, e cila u përfundua në vitin 2002. Në janar të vitit 2005 Papa Gjon Pali i II e lartëson në rangun e Arqipeshkvit Metropolit dhe më 29 qershor të të njëjtit vit merr nga Papa Benedikti i XVI në Bazilikatën e Shën Pjetrit Platinium e Metropolit.
