Një zyrtar i DPC, Bodo Weber, ia hedh fajin ndërhyrjes së Perëndimit për ngërçin në Kosovë – dhe paralajmëron se mund të jetë shumë vonë për një zgjidhje paqësore.
Teksa kriza politike në Kosovë po shkon edhe më tej në dhunë në kuvend, ku gazi lotsjellës hidhet rregullisht në ambientet e kuvendit dhe disa deputetë të opozitës janë arrestuar, shumë pyesin veten nëse mund të gjendet një zgjidhje paqësore e situatës së krizës.
Bodo Weber, një partner i lartë në Këshillin i Politikave të Demokratizimit, një iniciativë globale me bazë në SHBA që do të promovojë llogaridhënien në politikën e jashtme perëndimore, trembet se zgjidhjet paqësore nuk janë më të mundshme.
“Kriza aktuale politike në Kosovë ngjan si një ngërç total për mua,” tha ai për BIRN. Deputetët e opozitës kanë hedhur gaz lotsjellës si pjesë e fushatës së tyre të dhunshme kundër marrëveshjeve të ndërmjetësuara nga BE me Serbinë dhe Malin e Zi.
Weber thotë terreni për krizën u krijua vitin e shkuar kur një bllokadë 6-mujore pas zgjedhjeve të përgjithshme e bëri pothuajse të pamundur krijimin e një qeverie të re.
“Të vënë pas muri pasi u parandaluan nga dy vendime dukshëm të motivuara politikisht nga Gjykata Kushtetute për formimin e një qeverie me shumicën e tyre parlamentare vitin e shkuar, opozita zgjodhi rrugën e vetme – mjetet jashtë parlamentare,” tha ai.
Analistë në Kosovë dhe vende të tjera argumentuan në atë kohë se ndërhyrja e Perëndimit ishte kryesisht përgjegjëse për përjashtimin e lëvizjes nacionaliste Vetëvendosje nga qeveria.
Weber thotë se pak hapësirë manovrimi mbetet për një zgjidhje sot, pa ndërhyrje të mëtejshme të jashtme nga Perëndimi.
“Duke i dhënë mbështetje në mënyrë të dyshimtë në të cilën u formua koalicioni i madh, BE-ja dhe SHBA-ja e kanë diskredituar veten si ndërmjetës të ndershëm të zgjidhjes,” tha ai.
Zyrtarët perëndimorë nuk e kanë fshehur shqetësimin e tyre lidhur taktikat e opozitës.
Sekretari Amerikan i Shtetit, John Kerry, kritikoi partitë opozitare për ndërprerjen e punës së parlamentit dhe mbështeti marrëveshjet kontraversale në vizitën e tij në Kosovë më 3 dhjetor.
“Mos u gaboni, ne nuk do të mbështesnim asnjë marrëveshje që do të kërcënonte sovranitetin, sigurinë dhe pavarësinë e Kosovës,” tha Kerry.
Megjithatë, Vetëvendosje pretendon një mandat për veprimet e saj bazuar në faktin se më shumë se 200,000 shtetas kanë nënshkruar një peticion në kundërshtimin e marrëveshjeve.
“Do të jetë shumë e vështirë ta bësh perëndimin të pranojë të paktën në rrethana joformale se ka bërë një gabim dhe që të fillojë të pastrojë telashin e krijuar vitin e shkuar. Kjo përbën një përzierje të rrezikshme,” tha Weber.
“Kam frikë se një situatë ku asnjë aktor nuk është në gjendje apo nuk ka vullnet të lëvizë, do të jetë dhuna ajo që do të sjellë ndryshimin,” theksoi ai.
Weber kujtoi ngjarjet e verës së vitit 2011, kur dhuna në veri të Kosovës drejtuar nga serbët e nxiti kancelaren gjermane Angela Merkel të marrë në dorë çështjen Kosovë-Serbi.
“Ndonjëherë vetëm dhuna dhe vëmendja nga mediat perëndimore mund ta nxisin Perëndimin të heqë dorë nga një politikë e dështuar dhe të fillojë të veprojë seriozisht,” tha Weber.
“Por për shkak të rrethanave, jam shumë i shqetësuar rreth potencialit për dhunë të mëtejshme dhe serioze,” përfundoi ai.
