Në rastin e parë të këtij lloji në Rumani, prokurorët anti-terrorizëm po hetojnë një adoleshent të konvertuar në fenë islame për shpërndarje të propagandës xhihadiste online.
Prokurorët e Drejtorisë për Investigimin e Krimit të Organizuar dhe Terrorizmit, DIICOT, të martën arrestuan një 17-vjeçar nga qyteti jugor i Craiovës për akuzën e shpërndarjes së një video që nxiste dhunën islamike.
Adoleshenti dyshohet se ka përhapur mesazhe në internet në mbështetje të grupeve xhihadiste dhe ka publikuar një video të njerëzve të kapur nga ISI, sipas hetuesve.
“Kemi marrë dije për aktivitetet e tij dhe… DIICOT e ka marrë në shqyrtim çështjen dhe një hetim po kryhet,” tha Ovidiu Marincea, nga Shërbimi Rumun i Inteligjencës, SRI, të mërkurën.
Kjo është çështja e parë e këtij lloji në Rumani, një vend me një komunitet të vogël mysliman dhe pothuajse pa histori të aktiviteteve islamike.
Raportimet e medias thonë se adoleshenti është një gjimnazist në Craiova i cili vitin e shkuar u konvertua në fenë islame dhe mori emrin Omar al-Faruq. Ai së fundmi u largua nga shtëpia prej mosmarrëveshjeve me prindërit dhe jeton te gjyshërit.
Njësia anti-terrorizëm e Rumanisë ka intensifikuar përpjekjet në ditët e fundit, jo vetëm kundër islamikëve.
Javën e shkuar, Beke Istvan Attila, një hungarez etnik, qëndroi në burg për 30 ditë pasi akuzohet për krime në tentativë kundër rendit kushtetues.
Ai akuzohej për planifikim të shpërthimit të një eksplozivi të krijuar në kushte shtëpie në qyteti Targu Secuiesc të Transilvanisë, njohur në hungarisht si Kézdivásárhely, në Ditën Kombëtare të Rumanisë më 1 dhjetor.
Shumë hungarezë etnikë në Rumani kanë nostalgji për një rajon autonom në Transilvani, që dikur ishte pjesë e Hungarisë, megjithëse pak kanë marrë rrugën e dhunës.
