Me bekimin e kishës ortodokse serbe, aktivistët anti-NATO në Malin e Zi protestuan kundër hyrjes së vendit në aleancën ushtarake të perëndimit.
Disa mijëra njerëz, drejtuar nga partitë opozitare pro-ruse në Malin e Zi, u mblodhën në kryeqytetin e Podgoricës të mërkurën për të festuar Vitin e Ri ortodoks serb ndërsa protestonin kundër anëtarësisë në NATO të vendit.
Grupi opozitar, Fronti Demokratik, që organizoi festimin dhe protestën, nuk mbajti fjalim politik. Në vend të kësaj njerëzit u ftuan të festonin “Vitin e Ri serb”, fillimin e Vitit të Ri ortodoks tradicional sipas kalendarit julian.
Megjithatë, ata që morën pjesë mbanin flamuj serbë dhe rusë dhe pankarta si “ne nuk jemi në luftë, po ti?” dhe “Jo NATO-s”.
Eventi në vetvete kishte një shije të fortë anti-NATO, me disa muzikantë dhe grupe muzikore nga Mali i Zi dhe Serbia që performonin në kryeqytet.
Në tri pika kontrolli në sheshin kryesor të Pordogircës, pjesëmarrësit patën mundësinë të nënshkruanin një peticion ku bënin thirrje për referendum për anëtarësimin e Malit të Zi në NATO. Partia Popullore Socialiste, në opozitë, që lançoi peticionin, pretendoi se mijëra njerëz e kishin nënshkruar tashmë.
Opinioni publik rreth anëtarësimin në NATO mbetet i ndarë në Malin e Zi. Shumica e komunitetit serb në vend mbetet e zemëruar nga bombardimet e NATO-s në Serbi gjatë viteve 1990 që synonte të tërhiqte Beogradin nga Kosova.
Kisha ortodokse serbe në Malin e Zi dhe peshkopi që e drejton atë i dhanë bekimin festimeve në Podgoricë.
Kisha ortodokse serbe, që mban ndikimin më të madh në vend, ka kritikuar vazhdimisht qeverinë e Malit të Zi për planet e hyrjes në NATO.
Një sondazh i fundit sugjeroi se malazezët mbeten njëlloj të ndarë rreth mbështetjes dhe kundërshtimit të integrimit në NATO.
