Me mijëra kroatë kanë vënë emrat e tyre në regjistrin online të “tradhtarëve të kombit”, duke tallur kështu ministrin e ri të veteranëve të luftës Mijo Crnoja, i cili tha se po planifikonte një katalog të armiqve të shtetit.
Mbi 5,000 njerëz kanë hyrë në internet gjatë ditëve të fundit për t’u regjistruar si tradhtarë ndaj Kroacisë në shenjë goditje satirike për regjistrin zyrtar që është propozuar së fundmi nga ministri i ri i veteranëve të luftës Mijo Crnoja.
Regjistri i tradhtarëve, i krijuar nga arti kolektiv kroat SKROZ (“Krejtësisht”), doli në internet të shtunën, duke i lejuar njerëzit të shtonin emrat e tyre, vendet e banimit dhe arsyet pse ata e konsiderojnë veten tradhtarë.
SKROZ tha se ishte një reagim ndaj premtimit të Crnojas për të botuar një regjistër të tradhtarëve që tradhtuan interesat kombëtare kroate dhe një tjetër regjistër të njerëzve që sulmuan Kroacinë gjatë luftës së viteve 1990.
“Nëse dikush ka shkelur ligjet e Republikës së Kroacisë dhe ka tradhtuar interesat kombëtare, nuk ka asnjë arsye pse të mos përfshihet në regjistër,” tha Crnoja të shtunën.
SKROZ megjithatë tha se kishte ndërhyrë për të kursyer paratë që ministria e Crnojas do të duhet të shpenzonte me tenderat publikë për të krijuar regjistrin.
“Të vetëdijshëm për situatën e vështirë ekonomike në të cilën ndodhet vendi, ne kemi vendosur ta ndihmojmë ministrin dhe kështu edhe buxhetin, dhe e krijuam vetë regjistrin vullnetarisht,” tha ai.
Ndër ata që u regjistruan në faqen e internetit të SKROZ, Stipe Vitaljiç nga qyteti bregdetar i Splitit tha se ai e konsideron veten një tradhtar sepse “nuk jam i sigurt nëse mund ta bëj si duhet shenjën e kryqit”.
Ivica Cosiç nga Kutina në Kroacinë Qendrore tha se ai ishte tradhtar “sepse ishte liberal”, ndërsa Damir Tortiç nga Zagrebi tha se ai ishte regjistruar sepse “e dua Kroacinë, por nuk jam hajdut”.
Ndërkohë, Fronti i Punëtorëve i krahut të majtë po organizon për të hënën e ardhshme një protestë të “tradhtarëve” në sheshin e Shën Markut në Zagreb, ku ndodhen ndërtesa qeveritare dhe ajo parlamentare.
Në një deklaratë ku lajmërojnë për protestën, organizatorët listuan disa arsye pse ata e konsiderojnë veten tradhtarë.
“E pranoj që jam tradhtar, sepse nuk mendoj se “mbrojtësit” profesionistë (termi i përdorur në Kroaci për veteranët e luftës së viteve 1990) duhet të përcaktojnë atë që mendojnë dhe thonë,” ishte një nga arsyet e tyre – duke iu referuar Crnojas, i cili është veteran lufte.
Tomislav Karamarko, kryetari i partisë kryesore qeveritare, Bashkimi Demokratik Kroat, HDZ, të shtunën tha se ai e mbështeste idenë e regjistrit dhe e përkrahte Crnojan.
“Mbrojtësit duhen kuptuar, duke marrë parasysh ndjeshmërinë e tyre dhe kohën që ata kaluan duke luftuar në Luftën Atdhetare (emri zyrtar i përdorur për luftën e Kroacisë),” tha ai.
Por Nikola Grmoja, zëdhënës për partinë e vogël qeveritare, Ura e Listave të Pavarura, MOST, tha të hënën se partia e tij “nuk e mbështet një retorikë të tillë apo regjistrin e tradhtarëve”.
“Nuk e di se mbështetur në çfarë baze do të krijohet regjistri dhe bazuar në çfarë kriteresh, sepse kjo ngjan me një gjueti shtrigash që nuk i hyn në punë askujt,” tha Grmoja.
Ai shtoi se i përkrahë njerëzit që janë regjistruar në regjistrin e SKROZ të tradhtarëve.
