BHRT, televizioni publik i Bonjës dhe Hercegovinës, po përballet me vështirësi ekstreme financiare, paralajmëroi bordi i drejtorëve të tij, duke shtuar se nëse nuk gjendet një zgjidhje, kompania mund të detyrohet të mbyllet.
Radio Televizioni Publik i Bosnjës dhe Hercegovinës, BHRT po vuan vështirësi financiare ekstreme, gjë që e ka bërë të vështirë mbajtjen në këmbë të strukturës së tij dhe që mund të sjellë ndërprerjen e transmetimeve, bëri të ditur administrata e televizionit.
“Situata jonë është kritike: ne nuk mund të mbulojmë shpenzimet tona as për energji elektrike apo gaz, pa përmendur 5 milionë eurot që ne duhet t’i paguajmë Bashkimit Europian të Televizioneve,” deklaroi Belmin Karamehmedovic, drejtor i televizionit për BIRN.
“Nëse nuk gjejmë një zgjidhje për financat tona, ka rrezik konkret që BHRT të zhduket, gjë që do ta bëjë Bosnjën dhe Hercegovinën vendin e vetëm në Europë pa televizion shtetëror,” shtoi Karamehmedovic.
Menaxhmenti deklaroi se problemi kryesor është rënia e vazhdueshme e të ardhurave nga taksat, të cilat duhet të përbëjnë burimin më të madh të parave për të.
“Është një problem që ka vijuar prej vitesh. Të ardhurat nga taksat po bien me gati 2 milionë euro në vit,” tha Karamehmedovic.
Çdo pronar televizori në Bosnjë duhet të paguajë rreth 3.8 euro taksa për televizionin publik por vetëm gjysma e popullsisë aktualisht e paguan këtë, sipas të dhënave të publikuara nga Aljazeera Balkans.
Deri tani, taksat për televizionin publik janë mbledhur përmes faturave të tre kompanive të telefonisë fikse. Por gjatë viteve të fundit, boshnjakët kanë hequr dorë nga telefonia fikse në favor të televfonisë celulare, gjë që ka zvogëluar në vijimësi të ardhurat e BHRT.
Javën e kaluar, menaxhmenti lëshoi një deklaratë ku thuhej se stacioni kishte bërë sakaq çfarë mundej për të ulur kostot.
“Kostoja e burimeve njerëzore është reduktuar me një milionë marka të konvertueshme, (500 mijë euro) në krahasim me vitin 2015 dhe ne sakaq kemi shkurtuar të gjitha shpenzimet e mundshme pa dëmtuar punën tonë të përditshme,” deklaroi televizioni, i cili bëri thirrje për reforma të shpejta në sistemin e televizonit publik për të siguruar financime të qëndrueshme.
Menaxhmenti i kompanive në mënyrë të përsëritur ka kërkuar që taksat për BHRT të zhvendosen te faturat e energjisë elektrike të popullsisë.
Pavarësisht kërkesave të saj, një rishikim i shpejtë i ligjit për të gjetur mënyura të reja të mbledhjes së taksave duket i vështirë për t’u realizuar për shkak të sistemit të komplikuar politik të vendit.
“Qeveria jonë nuk është e shqetësuar për televizionin publik,” deklaroi Damir Smital, presidenti i sindikatës së punonjësve të BHRT për BIRN.
“Pagat po paguhen rregullisht për momentin,” tha Smital, “por ne duhet të gjejmë një zgjidhje që do të lejojë financimin e rregullt të televizionit,” shtoi ai.
Sindikata ka bërë thirrje për një protestë të punonjësve për të kritikuar si administrimin ashtu edhe mungesën e përgjigjeve nga institucionet.
Sipas Ministrisë së Komunikimit, gjithsesi, një zgjidhje pritet të arrihet brenda gjashtë muajve të ardhshëm.
“Këshilli i Ministrave do të diskutojë projektligjin më 4 shkurt për ta zgjatur vlefshmërinë e sistemit aktual të financimit deri më 30 qershor 2016. Ndërkohë, gjatë pesë muajve të ardhshëm, qeveria do të bie dakord për një mënyrë të re për të mbledhur burimet për funksionimin e televizionit publik,” deklaroi sekretari i ministrisë Igor Pejic për BIRN.