John Kerry do të shtrëngojë duart me presidentin Nishani dhe do të zhvillojë takime me kryeministrin Edi Rama dhe kreun e opozitës, Lulzim Basha, ndërsa mesazhet e tij priten me interes nga klasa politike shqiptare.
Shqipëria po bëhet gati të presë sekretarin amerikan të Shtetit, John Kerry-një vizitë që përkon me 25 vjetorin e rivendosjes së marrëdhënieve diplomatike mes Shqipërisë dhe Shteteve të Bashkuara të Amerikës.
Ai do të mbërrijë të dielën në orën 9:00 të mëngjesit në aeroportin “Nënë Tereza”, i shoqëruar nga ndihmës-sekretarja për Çështjet Europiane dhe Euro-Aziatike, Viktoria Nuland. Përgjatë 3 orëve të qëndrimit në Tiranë, Kerry do të shtrëngojë duart me presidentin Nishani dhe do të zhvillojë takime me kryeministrin Edi Rama dhe kryetarin e opozitës, Lulzim Basha.
Vizita e Sekretarit Kerry në Tiranë u lajmërua më 4 shkurt nga një zëdhënës i Departamentit të Shtetit. “Ai do të takohet me liderët shqiptarë për të diskutuar integrimin e mëtejshëm Euro-Atlantik të Shqipërisë dhe bashkëpunimin e fortë bilateral me Shtetet e Bashkuara,” tha zëdhënësi John Kirby.
Përmes një njoftimi për shtyp, Presidenca tha se John Kerry do të pritet në aeroportin “Nënë Tereza” nga presidenti Bujar Nishani. Më pas, ai do të udhëtojë drejt kryeministrisë, ku do të zhvillojë bisedime me kryeministrin Edi Rama.
Pas takimit me Edi Ramën, Kerry do të takojë edhe kryetarin e opozitës, Lulzim Basha si dhe një grup liderësh të rinj. Ai do të largohet në mesditë drejt Kalifornisë, ku do të bashkohet me presidentin Obama në Samitin U.S-ASEAN më 15 dhe 16 shkurt.
Vizita e shkurtër e Sekretarit amerikan të Shtetit në Tiranë pritet me interes të lartë për mesazhet që do t’i përcjellë klasës politike shqiptare. Ajo përkon me debatin për reformën në drejtësi, ku ambasada amerikane në Shqipëri ka luajtur një rol të dorës së parë në mbështetje të saj.
Një tjetër çështje në tavolinën e diskutimeve pritet të jetë ajo e anëtarëve të opozitës iraniane, të cilët gjenden nën mbrojtjen amerikane në kampin “Liria” në Irak. Qeveria e drejtuar nga Berisha mori përsipër strehimin e 200 muxhahedinëve disa vjet më parë, ndërsa mediat raportojnë se qeveria e Ramës ka rënë dakord të garantojë strehimin edhe për 1 mijë iranianë të tjerë.
