Pas pesë javësh Gjykata e Hagës do të japë vendimin e saj në çështjen kundër ish-presidentit serb të Bosnjës Radovan Karaxhiç.
Gjykata Penale Ndërkombëtare për ish-Jugosllavinë njoftoi të enjten se më 24 mars do të japë vendimin e saj shkallës së parë në çështjen kundër Karaxhiçit.
Ish-presidenti 69-vjeçar serb i Bosnjës akuzohet për organizim të gjenocidit të boshnjakëve nga Srebrenica në vitin 1995 dhe në shtatë komuna boshnjake në vitin 1992, persekutim të jo-serbëve në të gjithë vendin, terrorizim të popullsisë së rrethuar të Sarajevës dhe marrjen peng të paqeruajtësve të OKB-së.
Prokurorët kanë kërkuar dënim me burgim të përjetshëm.
Por në deklaratën përfundimtarë të Karaxhiçit para gjykatës në tetor të vitit 2014, ai pranoi se krimet ishin kryer gjatë asaj që ai e quajti lufta “e tmerrshme” e viteve 1992-1995, por këmbënguli se ai kurrë nuk i urdhëroi këto krime.
“E kam ndërgjegjen e pastër dhe zemrën e qetë, sepse unë nuk dëshiroja luftën,” tha ai.
Prokuroria megjithatë argumentoi se ai ishte përgjegjës për organizimin e gjenocidit, dëbimit me dhunë dhe përndjekjes në një shkallë masive gjatë konfliktit të viteve 1992-1995, me qëllim shkatërrimin e të gjithë komunitetit boshnjak.
“Kur mijëra vriten dhe mijëra traumatizohen dhe ndalohen, pjesa më e madhe e shtëpive dhe vendeve të tyre të lutjes shkatërrohen dhe pjesa tjetër e tyre zhvendosen në të gjithë botën, mund ta përcaktosh shumë qartë se me veprime të tilla synohet shkatërrimi i komunitetit,” tha prokurori Alan Tieger në argumentet e tij mbyllëse.
Gjyqi filloi në vitin 2009, pasi Karaxhiç u arrestua në Serbi dhe iu dorëzua gjykatës së Hagës pas më shumë se një dekadë në arrati.
Që atëherë, rreth 600 dëshmitarë kanë dhënë dëshmi dhe gjyqtarët do të duhet të marrin në konsideratë mbi 11,000 dëshmi prova materiale dhe dhjetëra mijëra faqe prova me shkrim.