Një ngarkesë e parë iraniane do të mbërrijë në Rumani së shpejti, ndërsa vendi po përfiton nga heqja e sanksioneve ndërkombëtare kundër Tehranit.
Ngarkesa e parë e rreth një milionë fuçive naftë të papërpunuar do të mbërrijë këtë javë në portin rumun të Konstancës, duke shënuar rikthimin e Iranit në tregun europian pas viteve të sanksioneve ndërkombëtare kundër Tehranit.
Tre milionë fuçi të tjera pritet të ngarkohen në Spanjë dhe në porte të tjera europiane për Total Oil të Francës, sipas raportimeve të medias.
Nafta e dërguar në Rumani është e destinuar për rafinerinë Petrotel në jug të qytetit rumun të Ploiesti, që zotërohet nga kompania ruse Lukoil.
Analistët thonë se kjo do të ndihmojë Petrotel të rimarrë veten pasi prokurorët sekuestruan asete me vlerë 2 miliardë euro vitin e shkuar në lidhje me një hetim për evazion fiskal dhe pastrim parash.
Rafineria Petrotel ende funksionon, por jo në kapacitet maksimal.
Analistët ekonomikë thonë se Rumania duhet ta shfrytëzojë rihapjen e tregut iranian.
“Rumania duhet të rinovojë marrëdhëniet e saj ekonomike me Iranin, një treg i madh, me burime të mira financiare. Ne duhet të eksportojmë nga pajisjet industriale te zgjidhjet e IT atje”, tha Ardian Negrescu nga kompania e informacionit të biznesit, Keysfin.
Tregtia mes Rumanisë dhe Iranit u llogarit se arriti shifrat e 150 milionë dollarëve vitin e shkuar, më shumë se gjysma e asaj që ishte përpara sanksioneve të imponuara ndaj Tehranit.
