Pas vonesave disaditore dhe në limitet e afateve kushtetuese, Presidenti Bujar Nishani firmosi sot dekretimin e ministrave Ahmetaj dhe Ekonomi duke i dhënë fund përplasjes me maxhorancën.
Presidenti Bujar Nishani firmosi sot (22 shkurt) dekretet për emërimin në detyrë të ministrave të rinj të qeverisë “Rama”, Arben Ahmetaj në postin e Ministrit të Financave dhe Milva Ekonomit në postin e Ministres së Zhvillimit Ekonomik, Turizmit, Tregtisë dhe Sipërmarrjes, gjashtë ditë pasi kërkesa e kryeministrit mbërriti në presidencë dhe një ditë para mbarimit të afatit kushtetues.
Tani, Kuvendi ka edhe tre ditë kohë për të diskutuar dekretet e shkarkimit dhe dhjetë ditë kohë për të diskutuar dekretet e emërimit.
Nishani, i zgjedhur me votat e Partisë Demokratike dhe LSI si president me shumicë të thjeshtë në vitin 2012, fillimisht dekretoi shkarkimin e dy ministrave paraardhës Cani dhe Ahmetaj dhe më pas refuzoi të dekretojë emërimet, duke pretenduar që Kuvendi i Shqipërisë duhej të miratonte fillimisht dekretet e shkarkimit para se ai të dekretonte emërimet. Veprimet e Nishanit bien ndesh me praktikën e deritanishme, ku zakonisht presidentët kanë miratuar njëkohësisht dekretet e shkarkimeve me ato të emërimeve të cilat janë diskutuar njëkohësisht në Kuvend më pas.
Sipas Kushtetutës, presidenti ka vetën rol honorifik në emërimet dhe shkarkimet e ministrave, e përforcuar kjo me një interpretim të nenit 98 të Kushtetutës nga Gjykata Kushtetuese në vitin 2002, ku sanksionohet se presidenti nuk ka të drejtë të diskutojë cilësitë e emrave të propozuar të ministrave.
Mbetet e paqartë se pse Nishani vendosi të veprojë ndryshe këtë herë, duke ngritur mundësinë e një krize kushtetuese. Në rast se Nishani nuk do të zbatonte detyrimin kushtetues të dekretimit të ministrave, qeveria pati kërcënuar aktivizimin për herë të parë në historinë e vendit të mekanizmit për shpalljen e një veprimi apo mosveprimi nga ana e presidentit si shkelje e Kushtetutës, pas të cilës, Kuvendit i lind e drejta të fillojë procedura shkarkimi ndaj tij.
Mandati i presidentit aktual përfundon vitin e ardhshëm, kohë në të cilën, Kuvendi do të duhet të fillojë procedurat për zgjedhjen e një presidenti të ri.
Ministri i Financave Shkëlqim Cani u shkarkua nga detyra më 16 shkurt pasi drejtoi Ministrinë e Financave që nga shtatori i vitit 2013. Kryeministria nuk dha motive për shkarkimin e tij, por marrëdhëniet mes tyre qenë përkeqësuar gjatë muajve të fundit si pasojë e rezistencës së bërë nga Ministria e Financave në lidhje me një koncesion të pakërkuar për ndërtimin e një sistemi elektronik për gjurmimin e faturave të Tatimit mbi Vlerën e Shtuar.
