Një protestë nga minatorët në Rumaninë perëndimore për shkak të humbjes së vendeve të punës nxjerr në pah dështimin e vendit për të ristrukturuar industrinë e prapambetur minerare të vendit.
Rreth 50 minatorë hynë në ditën e tretë të protestës së zhvilluar nën tokë kundër planeve të qeverisë për të ristrukturuar kompaninë shtetërore të energjisë Complexul Energetic Hunedoara, CEH, e cila u shpall në gjendjen e paaftësisë paguese në janar.
Qindra minatorë në minierat Vullkan dhe Lonea filluan protestën të hënën, nga frika se do të humbasin vendet e tyre të punës.
Disa kanë vijuar të qëndrojnë nën tokë, të tjerë kanë hyrë në grevë urie ndërsa të tjerë kanë zbritur në galeri por nuk kanë punuar.
“Ne po presim për masa të qarta nga qeveria për të na ndihmuar. Të gjithë minatorët po protestojnë kundër planeve për të ristrukturuar kompaninë përmes shkurtimit të vendeve të punës dhe ne do të vijojmë të protestojmë deri sa të marrim konfirmim se CEH nuk do të shpallet e falimentuar,” deklaroi Ioan Ciubotaru, një drejtues sindikalist.
Sindikatat ankohen gjithashtu për kushtet e këqija të punës, mungesën e kushteve të sigurisë si dhe kërkojnë që në këtë sektor të investohen më shumë para për të përmirësuar situatën.
Për të përmbledhur problemin, menaxheri i përgjithshëm i CEH Viorel Stancu dha dorëheqjen të martën, vetëm një javë pasi qe emëruar në këtë post.
Ministri i Energjisë së Rumanisë Victor Grigorescu tha se ai i mirëkuptonte njerëzit në situatë të vështirë, por se kompania kishte gjithsesi nevojë për t’u ristrukturuar.
“Ne na duhet të presim për një plan të qartë nga administratori gjyqësor. Deri atëherë, minatorët do të duhet të rikthehen në punë,” tha Grigorescu të mërkurën.
Ekspertët thonë se nuk ka opsion tjetër veç uljes së kostove dhe reduktimit të vendeve të punës. “Rumania nuk mund të përballojë më miliona euro në vit që duhet të paguhen për të ruajtur një industri që nuk është modernizuar dhe nuk është eficente,” komentoi analisti ekonomik Ilie Serbanescu.
Complexul Energetic Hunedoara, e cila përfshin termocentrale dhe miniera qymyrui me gropa të hapura, regjistroi humbje prej 404 milionë lei (90 milionë euro) vitin e kaluar.
Kompania prodhon pesë për qind të energjisë elektrike të vendit dhe punëson 6,300 njerëz, shumica e të cilëve janë në minierat e qymyrit.
Minierat qenë dikur një industri në lulëzim në Rumani, duke punësuar gati gjysmë milioni njerëz, përfshirë vendet e punës mbi tokë.
Industria u godit rëndë nga një program i nisur në vitin 1997 me asistencë të Bankës Botërore, i cili synonte të mbyllte minierat me humbje. Që nga ajo kohë, rreth 550 miniera janë mbyllur, nga të cilat, 100 qenë miniera qymyri.
Ristrukturimi i sektorit minerar ka rezultuar i vështirë për shkak të mungesës së investimeve të huaja dhe mungesës së dëshirës së zyrtarëve për të ndërmarrë masa drastike që mund të sjellin mbylljen e më shumë minierave me humbje.
Mbipunësimi, kushtet e këqija të punës dhe metodat inefikase i kushtojnë Rumanisë rreth 400 milionë euro në vit në formën e subvencionimeve dhe pagesave të ndihmës për minatorët dhe familjet e tyre.
