Parlamenti i Kosovës do të mblidhet të premten për të zgjedhur një president të ri – mes shqetësimeve për përplasje të mundshme mes mbështetësve të opozitës dhe partive qeverisëse.
Përpara zgjedhjeve për një president të ri të Kosovës, partitë opozitare i kanë nxitur mbështetësit e tyre të mblidhen përpara parlamentit, ku kanë fjetur në tenda si pjesë e fushatës së tyre për të detyruar qeverinë të japë dorëheqjen.
Anëtarë të Asamblesë do të votojnë të premten për një president të ri të Kosovës me Hashim Thaçin, ministrin aktual të jashtëm dhe lider i partisë demokratike të Kosovës, PDK, si favorit.
Lajme u përhapën nga kampi i PDK se mbështetësit e Thaçit nga bastioni i tij i rajonit të Drenicës planifikuan të udhëtonin në Prishtinë të premten për të festuar zgjedhjen e tij, që shtoi shqetësime rreth përplasjeve në Prishtinë.
Megjithatë të enjten në mbrëmje Thaçi i mohoi pretendime të tilla.
“Disa festojnë, të tjerë protestojnë njëkohësisht… Ka një interes mes shtetasve në ardhjen [për të festuar] dhe ne do t’i përgjigjemi me ftohtësi dhe qetësi,” tha ai.
Zyrtarët e policisë i thanë BIRN se ata ishin gati të përballeshin me çdo telash. “Policia ka ndërmarrë të gjithë përgatitjet e nevojshem për të ofruar siguri dhe rend publik gjatë seancës parlamentare dhe për të menaxhuar protestat që priten të mbahen nga partitë e tjera,” tha zëdhënësi Daut Hoxha.
Një deputet i PDK, Xhavit Haliti, të enjten nxiti të dyja palët të bisedojnë për trazirat.
“Është e kuptueshme që njëra palë do të festojë dhe tjetra do të mërzitet. Por i bëj thirrje të dyja palëve të shmangin përballjen,” tha Haliti.
Seanca speciale parlamentare e ngarkuar me votimin e presidentit u thirr të mërkurën por hedhja e gazit lotsjellës gjatë takimit nga opozita e ndërpreu atë.
Ramush Haradinaj, kreu i Aleancës për Ardhmërinë e Kosovës, AAK, të enjten shprehu kundërshtimet e ashpra të partisë së tij për seancën e të premtes dhe për nominimin e Thaçit si kandidat për president.
“Ne duam dorëheqjen e atyre që kanë shkelur kushtetutën, jo zgjedhje të një shkelësi të kushtetutës si president,” tha ai.
“Zgjedhja e Hashim Thaçit si president i Kosovës nuk është zgjidhje,” shtoi Haradinaj.
Ai po i referohej marrëveshjeve kontraversale të qeverisë së Kosovës nënshkruar gushtin e vitit të kaluar me Serbinë dhe Malin e Zi, që opozita e ka denoncuar si jokushtetuese.
“Opozita do të kundërshtojë zgjedhjen e presidentit si brenda dhe jashtë parlamentit,” paralajmëroi Haradinaj.
Teksa votimi afrohet, është e paqartë kur dhe si Thaçi do të zgjidhet president i Kosovës.
Një marrëveshje koalicioni nënshkruar mes Thaçit dhe kryeministrit Ligës Demokratike të Kosovës, së Isa Mustafa, në dhjetor 2014 ra dakord se posti i kryeministrit i përket LDK ndërsa ai i presidentit PDK sapo mandati i presidentes aktuale Atifete Jahjaga të mbarojë në prill.
Kushtetuta parashikon tre raunde të mundshme votimi për postin. Në dy të parët, presidenti duhet të zgjidhet me votat e të paktën 80 nga 120 deputetëve. Nëse këto dështojnë, presidenti mund të zgjidhet vetëm me 61 vota në raundin e tretë.
