Strategjia e brishtë e BE-së mund të shkërmoqet nëse liderët europianë nuk arrijnë të kufizojnë fluksin e refugjatëve deri në samitin e 7 marsit me Turqinë, paralajmëroi Komisioneri Europian i Migracionit.
Komisioneri i migrimit Dimitris Avramopoulos tha në një takim me ministrat e brendshëm nga BE-ja, Turqia dhe Ballkani në Bruksel se strategjia e BE-së për migrimin mund të dështojë, teksa diferencat mbi mënyrat për t’u përballur me krizën u rishfaqën sërish.
“Në 10 ditët e ardhshme, ne kemi nevojë për rezultate të qarta në terren, përndryshe ekziston rreziku që i gjthë sistemi të prishet,” tha Avramopoulos.
Por ministrat të enjten dështuan të kapërcenin përçarjet mbi qasjen e krizës që është përkeqësur që kur Austria lançoi një iniciativë për të mbyllur kufijtë bashkë me itinerarin e Ballkanit pa u konsultuar me Gjermaninë dhe Greqinë.
Vende të tjera të Ballkanit kanë mbështetur iniciativën, duke lënë mijëra refugjatë dhe migrantë në pikat e kufirit, veçanërisht në Greqinë veriore.
Mosmarrëveshjet në takimin në Bruksel e detyruan Greqinë të tërheqë ambasadorin në Austri pasi Viena prezantoi planin e saj, mbështetur nga tetë shtete të Ballkanit, për të cilin Athina ka frikë se do ta kthejë Greqinë në një dhomë pritjeje për mijëra refugjatë dhe migrantë.
Austria, Bulgaria, Kroacia dhe Sllovenia kanë bashkuar forcat me pse shtete të Ballkanit jo në BE për të lajmëruar ndërmarrjen hapave të përbasahkët për kufizimin e hyrjes së migrantëve.
Plani i hartuar në Vienë më 24 shkurt parashikon marrjen e shenjave të gishtërinjve të të mbërriturve të rinj dhe lejimin e kalimit vetëm të atyre me pasaporta.
Greqia ka frikë se kjo do të lejojë vetëm kalimin e sirianëve dhe irakianëve ndërsa do të kthehen në Greqi të gjithë të tjerët, përfshirë mijëra afganë që janë rikthyer tashmë nga Kroacia, Sllovenia, Serbia dhe Maqedonia.
Në një zhvillim veçmas, Hungaria lajmëroi një referendum mbi kuotën e refugjatëve propozuar nga Brukseli për ndarjen e barrës.
Blloku i 28-vendeve të BE-së dhe shteteve të Ballkanit Perëndimor, po luftojnë për të përballuar rritjen e migracionit ku vitin e shkuar mbërritën 1 milionë njerëz në kontinent.
Paaftësia e BE-së për të krijuar një qëndrim të unifikuar dhe për të mbrojtur të drejtat e njeriut dhe refugjatëve është kritikuar gjerësisht.
“Blloku politik më i pasur në botë me një popullatë totale prej mbi 500 milionë njerëz, dështoi të krijojë një përgjigje koherente, njerëzore dhe respektuese të të drejtave të njeriut,” tha Amnesty International në raportin e 24 shkurtit.
Liderët e BE-së do të takohen sërish në Bruksel më 7 mars për një samit emergjencë BE-Turqi që shihet si përpjekja e fundit nga unioni për të kontrolluar krizën e refugjatëve përpara se të ngrihet sërish numri në pranverën dhe verën e këtij viti.
