Policia shtoi praninë në kufirin e Maqedonisë me Greqinë nga frika e shtimit të përplasjeve teksa mijëra refugjatë kanë mbetur të bllokuar mes kushteve atmosferike në përkeqësim.
Policia maqedonase i tha BIRN të martën se kishte shtuar masat pas rritjeve të tensioneve në një kamp të mbipopulluar pranë kufirit pas një përplasjeje midis policisë dhe refugjatëve që u përpoqën të hyjnë me forcë në vend një ditë më parë.
“Ne i kemi ndjekur nga afër zhvillimet… Kemi shtuar tashëm praninë tonë në kufi teksa më shumë përplasje mund të ndodhin,” tha një burim i policisë për BIRN në kushte anonimiteti.
Media maqedonase raportoi se grupet e zemëruara të refugjatëve dhe migrantëve ishin mbledhur në anën greke dhe po drejtoheshin për në kufirin me Maqedoninë.
Dëshpërimi u shtua pranë kampit Idomeni, ku situata u përkeqësua pas shirave të dendur.
Kushtet e mbipopullimit kanë çuar në mungesë ushqimin, strehimi, uji dhe higjiene në kamp dhe të paktën 1500 njerëz e kaluan natën e të hënës në qiell të hapur, tha agjencia e refugjatëve e OKB.
“Kushtet e mbipopullimit po çojnë mangësi ushqimi, strehimi, uji dhe higjiene. Siç e pamë të gjithë dje, tensionet janë mbledhur, duke nxitur dhunë dhe duke i çuar gjërat në dorë të kontrabandistëve,” tha zëdhënësi Andrian Edwards i UNHCR në një deklaratë për median të martën.
Presidenti maqedonas paralajmëroi të martën se “itinerari i Ballkanit” nëpër vendin e tij do të mbyllet plotësisht në vendin e tij për shkak të kufizimeve mbi refugjatët imponuar nga Austria.
Rreth 7000-10,000 refugjatë dhe migrantë mbeten të zënë në kurth në anën greke të kufirit teksa Maqedonia vazhdon të lejojë vetëm disa prej tyre të kalojnë.
Autoritetet maqedonase kanë thënë se kufiri vazhdon të jetë i hapur por ata kanë lejuar vetëm kalimin e 580 refugjatëve në ditë.
Agjencia greke e lajmeve ANA tha se rreth 6000 persona të tjerë pritet të drejtohen në kufi pasi të mbërrijnë nga ishujt e Egjeut nga Turqia fqinje.
Presidenti i Këshillit Europian, Donald Tusk ka lajmëruar se do të vizitojë Maqedoninë të mërkurën si pjesë e përpjekjeve të BE-së për të zgjidhur krizën në vazhdim të refugjatëve.
