Ndërtesa luksoze e diktatorit të fundit rumun me 80 dhoma do të hapet për herë të parë për publikun.
Vila private luksoze e komunistit rumun, Nikolai Çaushesku, do të hapet për publikun të shtunën, për herë të parë në histori.
Rezidenca me 80 dhoma, e quajtur “Pallati Pranveror” me vendndodhje në lagjen më të njohur të Bukureshtit, përfshin një kinema, një pishinë dhe një gardërobë mbresëlënëse. Ka gjithashtu një oborr prej 14,000 metra katrorë.
Ndërtesa është projektuar në mesin e viteve 1960, bazuar në kërkesën e saktë të Çausheskut dhe gruas së tij Elena, e cila thuhet se ka zgjedhur personalisht shandanët dhe mozaikët.
Ata i kaluan 25 vitet e fundit të jetës në pallat, bashkë me fëmijët e tyre Niku, Zoe dhe Valentin.
Pas gjyqit të nxituar të Çausheskut dhe ekzekutimit në dhjetor 1989, ndërtesa u administrua nga shteti rumun dhe shumë rrallë u përdor për delegacionet zyrtare. Ajo u nxorr në shitje në vitin 2014 por nuk pati interes nga blerësit.
Pallati tani do të hapet për publikun, me një biletë që fillon prej 15 lei ose 4 euro.
Muajin e shkuar, Pallati gjigant i Parlamentit Rumun, i njohur gjithashtu si Shtëpia e Popullit, u hap për ture virtuale në një platformë online.
Ndërtesa është bërë atraksioni më i madh turistik në Rumani.
Rumania ka ende një marrëdhënie ambivalente me të shkuarën e vet komuniste. Regjimi autoritar nuk është investiguar plotësisht dhe sistemi që e bëri atë të mundur nuk është dënuar ende.
Më shumë se 25 vite pas rënies së regjimit, sondazhet tregojnë se shumë rumunë i kanë rishqyrtuar mendimet e tyre për regjimin dikur të urryer.
Të shqetësuar me problemet e tyre financiare, shumë njerëz nuk janë të preokupuar rreth regjimit, që dikur lidhej me urinë, censurën, kufijtë e mbyllur dhe frikën e policisë sekrete.
Tani sondazhet tregojnë se rreth gjysma e popullatës beson se jeta ishte më e mirë në periudhën komuniste, me standarde më të larta jetese dhe siguri pune.
Më pak se çereku i rumunëve thonë se jeta u është përmirësuar që nga rrëzimi i regjimit të Çausheskut meqë Rumania u anëtarësua në Bashkimin Europian në 2007.
