Rumania fitoi vlerësimin dhe mbrojtjen e BE-së për produktin e dytë vendas, salsiçen Sibiu karakteristike në vend, por synon të përfshijë më tepër delikatesa në përftimin e fondeve europiane për promovim.
Kur në fillim të një konference informuese të javës së fundit, zëdhënësi i qeverisë rumune i ofroi gazetarëve disa copa salsiçe të thara, nuk ishte një befasi por një lëvizje reklamuese.
“Duam ta ndajmë kënaqësinë e këtij çasti me juve, pasi Sallami Sibiu është bërë një produkt i mbrojtur në Bashkimin Europian,” i tha zëdhënësi Dan Suciu audiencës së tij.
Salsiçja e tharë, e quajtur “Sallami Sibiu”, që është njohur me statusin e Produktit të Mbrojtur Gjeografik në BE, ishte i dyti që mori këtë lloj vlerësimi nga produktet rumune, pas reçelit të kumbullës Topoloveni.
Kjo do të thotë se prodhuesit e këtyre produkteve mund të aplikojnë për fonde europiane për ta promovuar atë jashtë shtetit.
Sallami Sibiu, që bëhet nga mishi i tharë i mbuluar nga një shtresë e hollë myku, prodhohej së pari në Transilvani në fundit e shekullit 19. Shihej si një delikatesë në kohën komuniste, veçanërisht kur ushqimi filloi të racionalizohej në vitet 1980.
Lajme të tjera pasuan këtë javë kur Komisioni Europian lajmëroi se kishte ofruar statusin e Produktit të Mbrojtur të Origjinës për “Telemeaua de Ibanesti”, djathin e kripur të lopës, si ai feta i Greqisë, prodhuar nga fermerët në rajonin verior të Transilvanisë.
Djathi njihet tani si një produkt bulmetor i prodhuar nën një zonë të kufizuar gjeografike.
Djathi special përftohet vetëm nga lopët e rritura në disa fshatra në Kontenë Mures, ku procesi i prodhimit kalohet brez pas brezi. Djathi kriposet nga uji i kripur i disa puseve në rajon.
Ministri rumun i Bujqësisë e vlerësoi lajmin por shtoi se duhej bërë më shumë për të promovuar produktet e vendit.
“Rumania ka shumë produkte të tjera të cilësisë së lartë që vijnë nga sektori rural dhe për të cilat prodhuesit kanë nevojë për fonde të promovimit,” shtoi Irimescu.
Regjistri europian i produkteve të mbrojtura përfshin 1335 produkte. Rumania ka vetëm tre prej tyre në listë, krahasuar me Bullgarinë që ka pesë, Hungarinë me 14 dhe Poloninë me 36. Italia ka shumicën e produkteve të mbrojtura nga BE-ja, plot 283.
Rumania shpreson që së shpejti të marrë vlerësimin e BE-së edhe për dy produkte të tjera, një krap të tymosur nga rajoni Barsei dhe për Kurtos Kalacs, një ëmbëlsirë mjaft e veçantë.